شمالی وزیرستان میں دھماکا، ایک شخص جاں بحق ایک شدید زخمی

میران شاہ (ڈیلی اردو) خیبر پختونخوا کے قبائلی ضلع شمالی وزیرستان کے تحصیل دوسلی میں بم دھماکے کے نتیجے میں ایک شخص جاں بحق جبکہ دوسرا زخمی ہوگیا۔

مقامی ذرائع کے مطابق دھماکے میں جاں بحق ہونے والے شخص کی شناخت نعیم کے نام سے ہوئی ہے جبکہ زخمی ہونے والے شخص کا نام حاجی نایوم بتایا گیا ہے دونوں مقامی لوگ ہیں جو آج صبح گاڑی میں جارہے تھے کہ لکی میدان علاقے میں انکی گاڑی پہلے سے نصب شدہ بم سے ٹکراگئی۔

ذرائع کے مطابق دھماکے کی وجہ سے گاڑی مکمل طور پر تباہ ہوگئی جبکہ زخمی شخص کو قریبی اسپتال پہنچا دیا گیا ہے۔

دوسری جانب تحصیل بویہ کے علاقے محمد خیل سے ایک نامعلوم شخص کی لاش برآمد ہوئی ہے جسے فائرنگ کر کے قتل کیا گیا ہے۔

یاد رہے کہ بدھ کے روز بھی تحصیل بویہ میں نامعلوم افراد نے مسجد پرفائرنگ کی تھی جس کے نتیجے میں ایک شخص شہید جبکہ ایک زخمی ہوگیا تھا۔