شمالی وزیرستان میں سیکیورٹی فورسز کا آپریشن، تحریک طالبان پاکستان کے 2 دہشت گرد ہلاک

راولپنڈی (نمائندہ ڈیلی اردو) صوبہ خیبر پختونخوا کے قبائلی ضلع شمالی وزیرستان میں فورسز کے آپریشن میں کالعدم تنظیم تحریک طالبان پاکستان سجنا گروپ کے 2 خطرناک دہشت گرد ہلاک ہوگئے۔

پاکستان فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے شمالی وزیرستان کے علاقے نرگوسا میں خفیہ اطلاع پر آپریشن کیا جس میں 2 دہشت گرد ہلاک ہوئے جن کی شناخت عثمان علی اور وحید لشتئی کے نام سے ہوئی جب کہ فائرنگ کے دوران ایک دہشت گرد زخمی ہواجسے گرفتار کرلیا گیا۔

آئی ایس پی آر کا بتانا ہےکہ مارے گئے دہشت گرد تحریک طالبان پاکستان سجنا گروپ کے سرگرم رکن تھے، دونوں دہشت گرد آئی ای ڈیز بنانے کے ماہر اور دہشتگردی کے ٹرینر بھی تھے۔

آئی ایس پی آر کے مطابق ہلاک دہشت گرد سکیورٹی فورسز پر حملوں میں ملوث تھے، دہشتگرد عثمان 14 اکتوبر 2020 کو سکیورٹی فورسز پر ہونے والے حملے میں ملوث تھا جس میں کیپٹن عمر چیمہ، دو جے سی اوز اور 3 سپاہی ہلاک اور 4 سپاہی زخمی ہوئے تھے۔