شمالی وزیرستان میں فائرنگ سے فوجی ہلاک، دہشت گرد زخمی حالت میں گرفتار

راولپنڈی (ڈیلی اردو) صوبہ خیبر پختونخوا کے قبائلی ضلع شمالی وزیرستان میں سیکیورٹی فورسز نے کارروائی کرتے ہوئے ایک دہشتگرد کو زخمی حالت میں گرفتار کرلیا جبکہ فائرنگ کے تبادلے مین ایک فوجی ہلاک ہوگیا۔

پاکستانی فوج کے شعبہ تعلقات عامہ (آئی ایس پی آر) کے مطابق فوجیوں نے مؤثر طریقے سے دہشت گردوں کے ٹھکانے کا پتہ لگایا اور ایک دہشت گرد کو زخمی حالت میں گرفتار کیا تاہم، شدید فائرنگ کے تبادلے کے دوران41 سالہ حوالدار محمد ظاہر ہلاک ہوگیا۔

ان کا مزید کہنا تھا کہ علاقے میں دہشت گردوں کے خاتمے کے لیے آپریشن کیا جا رہا ہے، پاکستان کی سیکیورٹی فورسز دہشت گردی کی لعنت کو ختم کرنے کے لیے پر عزم ہیں اور بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔

اس سے قبل 4 جنوری کو شمالی وزیرستان کی تحصیل میر علی میں بم دھماکا میں تین بچے ہلاک ہوگئے تھے۔

2 جنوری کو شمالی وزیرستان کے میر علی بازار میں نامعلوم افراد کی فائرنگ سے 6 افراد ہلاک ہو گئے تھے۔