شمالی وزیرستان میں فائرنگ کے دو واقعات میں چار خواتین سمیت 5 افراد ہلاک، 3 اغوا

اسلام آباد (ش ح ط) صوبہ خیبر پختونخواہ کے قبائلی ضلع شمالی وزیرستان کے دو مختلف واقعات میں 4 خواتین سمیت 5 افراد ہلاک اور ایک شدید زخمی جبکہ 3 افراد کو اغواء کر لیا گیا۔

تفصیلات کے مطابق شمالی وزیرستان کے سب ڈویژن میرعلی میں دو مختلف واقعات میں نامعلوم مسلح افراد کی فائرنگ سے 4 خواتین سمیت 5 افراد ہلاک ہو گئے۔

پولیس ذرائع کے مطابق پہلا واقعہ میرعلی سب ڈویژن کے تحصیل شوا کے سیفلی کابل خیل کے گاوں ٹنڈی میں نامعلوم مسلح افراد کی گاڑی پر فائرنگ سے گاڑی کا ڈرائیور والی گل موقع پر ہی ہلاک ہو گیا جبکہ گاڑی میں سوار باقی 3 افراد کو اغواء کر لیا گیا۔ اغواء ہونے والوں میں انجنئیر حمزہ، ہیلتھ ڈیپارٹمنٹ کے مسعود رحمن اور میانوالی سے تعلق رکھنے والے یاور عباس شامل ہیں۔ جبکہ دوسرا واقعہ سب ڈویژن میرعلی کے علاقے ائپی گاؤں میں نامعلوم مسلح افراد نے صباون این جی اوز کے گاڑی پر فائرنگ کر دی جس کے نتیجے میں 4 خواتین ہلاک اور ڈرائیور شدید زخمی ہوگئے گیا۔ زخمی ڈرائیور اور ڈیڈ باڈی کو میرعلی ہسپتال منتقل کردیا گیا ہے

ڈرائیور اور ہلاک خواتین کا تعلق بنوں ڈویژن سے بتایا جاتا ہے۔ پولیس و سیکیورٹی فورسز موقع پر پہنچ کر تفتیش شروع کردی ہیں۔