شمالی وزیرستان میں نامعلوم مسلح افراد کی فائرنگ، دو طالبان کمانڈر ہلاک

میرانشاہ (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان کی تحصیل میر علی میں نامعلوم مسلح افراد کی فائرنگ کے نتیجے میں کالعدم تنظیم کے دو کمانڈر ہلاک ہو گئے۔

ذرائع کے مطابق واقعہ تپی سے سپلگہ جاتے ہوئے پیش آیا، جہاں مسلح افراد نے کالعدم ٹی ٹی پی کے کمانڈر زبیر عرف صفیان اور کمانڈر یاسر کو نشانہ بنایا۔

مقامی ذرائع کا کہنا ہے کہ ہلاک ہونے والے کمانڈروں پر طاقت اور اختیارات کے اختلافات کے تناظر میں حملہ کیا گیا۔

ڈرون حملے میں سات سالہ بچی ہلاک

دریں اثنا شمالی وزیرستان کے گاؤں مبارک شاہی میں اتوار کو ڈرون حملے کے نتیجے میں ایک سات سالہ بچی ہلاک ہو گئی۔ ہلاک ہونے والی بچی کی شناخت ہلمند ولد سلیم مرجان کے طور پر ہوئی۔

نمائندہ ڈیلی اردو کے مطابق لاش کو میر علی امن دھرنے کی طرف لایا جائے گا اور نمازِ جنازہ میر علی چوک میں ادا کی گئی، جس میں مقامی افراد نے شرکت کی۔

اس واقع کی  شدید مذمت کرتے ہوئے ہزاروں مقامی افراد سڑکوں پر نکل آئے۔ یہ مظاہرین ہلاک ہونے والے بچی کی لاش کو ایک مرکزی شاہراہ پر رکھ کر انصاف کا تقاضہ کر رہے ہیں۔

میر علی ان طالبان عسکریت پسندوں کا ایک اہم گڑھ  سمجھا جاتا ہے، جہاں ان کی موجودگی کافی مظبوط ہے۔ ٹی ٹی پی افغان طالبان سے الگ گروپ ہے، جو اکثر پاکستانی میں سکیورٹی اداروں کے اہلکاروں کو نشانہ بناتا ہے۔