صومالیہ: الشباب کا سینئر کمانڈر ہلاک، دو گرفتار

موغادیشو (ڈیلی اردو) صومالی نیشنل آرمی(ایس این اے) نے وسطی شبیلی علاقے میں کارروائی کے دوران الشباب کے ایک سینئر رہنما کو ہلاک اور 2 دیگر کو گرفتار کر لیا ہے۔

ایس این اے کی تیسری یونٹ کے کمانڈر ابشیر محمد محمود نے اس کی تصدیق کرتے ہوئے ملٹری ریڈیو کو بتایا کہ گزشتہ روز فوج نے منصوبہ بندی کے ساتھ جنوبی صومالیہ میں بالاد اور جواہر قصبوں کو ملانے والی سڑک پر کارروائی کی اور عسکریت پسندوں کو جانی نقصان پہنچایا۔

محمود نے کہا کہ ہماری فورسز نے الشباب کے ایک سینئر کمانڈر کو ہلاک کر دیا ہے جو وسطی شبیلی علاقے میں بارودی سرنگیں نصب کرنے کا انچارج تھا، مزید بتایا کہ کارروائی کے دوران فورسز نے الشباب کمانڈر محمود کے محافظ کو ہلاک اورالشباب کے 2 دیگر سینئر رہنماؤں کو بھی گرفتار کر لیا ہے۔

سرکاری فوج نے جنوبی خطوں میں الشباب کے خلاف کارروائیاں تیز کردی ہیں لیکن عسکریت پسند ابھی تک ان خطوں کے کچھ دیہی علاقوں پر قابض ہیں اور بارودی سرنگیں نصب کر کے اور گھات لگا کر حملے کرتے رہتے ہیں۔