صومالیہ میں الشباب کے شریک بانی عبداللہی یارے ڈرون حملے میں ہلاک

موغا ديشو (ڈیلی اردو) صومالیہ میں الشباب کے شریک بانی عبداللہی یارے ڈرون حملے میں مارے گئے۔ 

عالمی خبر رساں ادارے کے مطابق صومالیہ نے امریکا کو انتہائی مطلوب الشباب کے رہنما عبداللہی یارے کی ڈرون حملے میں ہلاکت کی تصدیق کرتے ہوئے بتایا ہے کہ یہ کارروائی یکم اکتوبر کو غیر ملکی معاونت کے ساتھ کی گئی تھی۔

U.S. forces conduct strike in Somalia targeting al-Shabaab leader

In coordination with the Federal Government of Somalia, U.S. Africa Command conducted an airstrike against the al-Shabaab militant network in Somalia on October 1.

Read More: https://t.co/h2rfdYpNSl pic.twitter.com/MX3EqqwNzg

— U.S. Africa Command (AFRICOM) (@USAfricaCommand) October 3, 2022

القاعدہ سے منسلک تنظیم الشباب کے ڈورن حملے میں ہلاک ہونے والے سرگرم رہنما عبداللہی یارے کی زندہ یا مردہ گرفتاری پر امریکا نے 3 ملین ڈالر کا انعام رکھا تھا۔ وہ 2012 سے امریکا کو مطلوب 7 رہنماؤں کی فہرست میں شامل تھے۔

عبداللہی کے بارے میں کہا جاتا ہے کہ وہ الشباب کے شریک بانی ہونے کے علاوہ شوریٰ کونسل کے سربراہ اور تنظیم کے امور مالیات کے بھی نگراں تھے۔ علاوہ ازیں موجودہ علیل امیرِ الشباب احمد دیری کے جانشین بھی سمجھے جاتے تھے۔

خیال رہے کہ صومالیہ کے نومنتخب صدر حسن شیخ محمد نے شدت پسندوں تنظیموں بالخصوص الشباب کے خلاف ہمہ گیر جنگ شروع کرنے کے عزم کا اظہار کرتے ہوئے الشباب کے ٹھکانوں کے نزدیک رہنے والے شہریوں کو کہیں اور منتقل ہونے کی ہدایت کی تھی۔

صومالیہ میں سرکاری دفاتر، ہوٹلز اور فوجیوں پر حملے میں الشباب ملوث رہی ہے اور چند روز قبل ہی دارالحکومت موغادیشو میں 30 گھنٹے تک ہوٹل پر قبضہ کیا تھا جس میں 21 افراد ہلاک ہوئے تھے۔