غزہ جنگ بندی معاہدہ برقرار رہنے کیلئے پرعزم ہیں، حماس رہنما خلیل الحیا

قاہرہ (ڈیلی اردو ) حماس کے رہنما اور چیف مذاکراتکار خلیل الحیا نے قاہرہ نیوز چینل کو دیے گئے ایک انٹرویو میں کہا ہے کہ ہم امن معاہدے کی تکمیل کے لیے پرعزم ہیں۔

منگل کی صبح نشر ہونے والے انٹرویو میں خلیل الحیا کا کہنا تھا کہ اسرائیل اور حماس کے درمیان ہونے والا غزہ جنگ بندی معاہدہ قائم رہے گا کیونکہ ’ہم چاہتے ہیں کہ یہ [معاہدہ] برقرار رہے، اور اس کی پاسداری کے لیے ہم بہت پر عزم ہیں۔‘

الحیا نے غزہ امن معاہدے کے لیے مصر، قطر اور ترکی کی ثالثی کی کوششوں کو سراہا۔

یرغمالیوں کی لاشوں کی واپسی میں تاخیر کے متعلق تبصرہ کرتے ہوئے ان کا کہنا تھا کہ حماس یرغمالیوں کی لاشیں تلاش کرنے اور انھیں طے شدہ وقت کے اندر اندر اسرائیل کے حوالے کرنے کے لیے سنجیدہ ہے۔

ان کا کہنا تھا کہ وہ بھی چاہتے ہیں کہ یرغمالیوں کی لاشیں ان کے ورثا تک جلد از جلد پہنچا دی جائیں تاکہ ہمارے اپنوں کی لاشیں ہمارے حوالے کر دی جائیں اور ہم ان کی باعزت طریقے سے تدفین کر سکیں۔

تاہم خلال الحیا کا کہنا تھا کہ انھیں لاشوں کی تلاش میں کافی مشکلات کا سامنا کرنا پڑ رہا ہے۔ ان کا کہنا تھا کہ غزہ میں بڑے پیمانے پر ہونے والی تباہی کے بعد کئی لاشیں ملبے تلے دبی ہوئی ہیں۔ 

ان کا مزید کہنا تھا کہ اِن لاشوں کو نکالنے کے لیے ’وقت اور بھاری مشینری کی ضرورت ہے۔ انھوں نے امید ظاہر کی کہ جلد ہی یہ کام مکمل کر لیا جائے گا۔

حماس کے رہنما کا مزید کہنا تھا کہ اب تک اسرائیل بھی معاہدے کی پاسداری کرتے ہوئے امدادی سامان کی طے شدہ تعداد غزہ میں لانے کی اجازت دے رہا ہے۔ 

انھوں نے امید ظاہر کی کہ موسمِ سرما سے قبل معاہدے کے ثالث مزید امدادی سامان خاص طور پر خیمے اور طبی سامان غزہ میں لانے کے لیے مداخلت کریں گے۔