غزہ: فلسطینی ہلاکتیں 66 ہزار سے تجاوز، زخمیوں کی تعداد 1 لاکھ 68 ہزار سے زیادہ

غزہ (ڈیلی اردو/اے ایف پی/روئٹرز/ڈی پی اے) غزہ پٹی کی قریب دو سال سے جاری اسرائیل اور حماس کی جنگ میں فلسطینی ہلاکتوں کی مجموعی تعداد اب 66 ہزار سے تجاوز کر گئی ہے، جن میں اکثریت خواتین اور بچوں کی تھی۔ یہ بات غزہ پٹی کی وزارت صحت نے اتوار 28 ستمبر کے روز بتائی۔

مصری دارالحکومت قاہرہ سے ملنے والی رپورٹوں میں غزہ پٹی کی حماس کے زیر انتظام کام کرنے والی وزارت صحت کے اعلیٰ حکام کے حوالے سے بتایا گیا کہ سات اکتوبر 2023ء کو شروع ہونے والے اس جنگ میں آج اتوار کی سہ پہر تک فلسطینی ہلاکتوں کی کُل تعداد 66,005 ہو گئی تھی جبکہ زخمیوں کی مجموعی تعداد بھی 168,162 بنتی ہے۔

وزارت صحت کے مطابق ان مرنے والوں میں 79 ایسے شدید زخمی افراد بھی شامل ہیں، جنہیں گزشتہ 24 گھنٹوں کے دوران علاج کے لیے مختلف مقامی ہسپتالوں میں لایا گیا تھا۔

اسی دوران غزہ پٹی میں طبی اور امدادی کارکنوں نے بتایا کہ آج اتوار کو جنگ سے تباہ شدہ اس تنگ ساحلی پٹی میں مزید 21 افراد مارے گئے۔ غزہ سٹی کے الناصر نامی علاقے میں ایک فضائی حملے میں مارے جانے والے پانچ فلسطینیوں کے علاوہ وسطی غزہ پٹی میں رہائشی مکانات پر کیے جانے والے اسرائیلی فضائی حملوں میں بھی کم از کم 16 افراد کی ہلاکت کی اطلاعات ہیں۔

اس کے علاوہ وسطی غزہ پٹی میں مقامی ہسپتالوں کے ذرائع نے نیوز ایجنسی ایسوسی ایٹڈ پریس کو بتایا کہ 10 دیگر افراد اس وقت مارے گئے جب نصیرات کے مہاجر کیمپ میں کم از کم دو فضائی حملوں میں رہائشی مکانات کو نشانہ بنایا گیا۔

غزہ پٹی کی جنگ سات اکتوبر 2023ء کو اسرائیل میں حماس کے اس بڑے دہشت گردانہ حملے کے فوری بعد شروع ہوئی تھی، جس میں 1200 سے زائد افراد مارے گئے تھے اور واپس غزہ جاتے ہوئے فلسطینی جنگجو تقریباﹰ 250 افراد کو یرغمال بنا کر اپنے ساتھ بھی لے گئے تھے۔ درجنوں اسرائیلی یرغمالی ابھی تک حماس کے قبضے میں ہیں۔