غزہ میں اسرائیلی حملے میں القسام بریگیڈز کا سینیئر کمانڈر ہلاک

یروشلم (ڈیلی اردو ) اسرائیلی میڈیا کے مطابق سات اکتوبر 2023 کو اسرائیل پر حملوں کی منصوبہ بندی میں شامل حماس کے ایک اہم عسکری کمانڈر کو غزہ میں اسرائیلی ڈرون حملے میں ہلاک کر دیا گیا ہے۔

رپورٹس کے مطابق اسرائیلی فوج نے ہفتے کے روز غزہ شہر میں ایک گاڑی کو نشانہ بنایا، جس کے نتیجے میں القسام بریگیڈز کے سینیئر کمانڈر رائد سعد ہلاک ہوئے۔ وہ سات اکتوبر کے حملوں کے ماسٹر مائنڈز میں شامل تھے۔

غزہ میں حماس کے طبی ذرائع کے مطابق اس حملے میں چار افراد ہلاک اور کم از کم 25 زخمی ہوئے، تاہم فوری طور پر رائد سعد کی ہلاکت کی باضابطہ تصدیق نہیں کی گئی۔

اسرائیلی فوج کا کہنا ہے کہ غزہ شہر میں حماس کے ایک سینئر کمانڈر کو نشانہ بنایا گیا، تاہم نام ظاہر نہیں کیا گیا۔ اگر سعد کی ہلاکت کی تصدیق ہو جاتی ہے تو یہ اکتوبر میں جنگ بندی کے بعد حماس کے کسی بڑے رہنما کی نمایاں ترین ہلاکت ہو گی۔

حماس کو امریکہ اور یورپی یونین کے ساتھ ساتھ کئی دیگر ممالک نے بھی ایک دہشت گرد تنظیم قرار دے رکھا ہے۔ القسام بریگیڈز حماس کا عسکری بازو ہے۔

القسام بریگیڈز کی بنیاد 1992ء میں رکھی گئی تھی۔ سی آئی اے کی فیکٹ بُک کے مطابق القسام بریگیڈز کے پاس 20 ہزار سے 25 ہزار تک کے درمیان جنگجو ہیں حالانکہ اس تعداد کی آزادانہ طور پر تصدیق کرنا ناممکن ہے۔ اسی عسکری  گروپ نے اس وقت غزہ پٹی کے علاقے میں 240 کے قریب اسرئیلی باشندوں اور دیگر ممالک کی شہریتوں کے حامل افراد کو یرغمال بنایا ہوا تھا۔

اس مسلح ونگ کا نام ایک شامی عالم عزالدین القسام کے نام  پر رکھا گیا ہے، جو 1882ء میں شام میں پیدا ہوئے تھے۔ القسام ایک عالم دین ہونے کے ساتھ ساتھ ایک سماجی مصلح بھی تھے، جو اس بات کے قائل تھے کہ یورپی استعماری طاقتوں کو مشرق وسطیٰ سے نکالنے کا واحد راستہ تشدد ہے۔ وہ 1935ء میں برطانوی پولیس کے ہاتھوں مارے گئے تھے۔

القسام بریگیڈز غزہ پٹی کی زمین کے نیچے حماس کی سرنگوں کے وسیع تر نیٹ ورک کی تعمیر میں بھی ملوث رہی ہے، جو ماضی میں اسرائیل پر حملوں کے لیے استعمال ہوتی رہی ہیں۔