فلسطینی ریاست کے قیام تک ہتھیار نہیں ڈالیں گے، حماس

غزہ (ڈیلی اردو/نیوز ایجنسیاں) فلسطینی تنظیم حماس نے واضح کیا ہے کہ وہ آزاد فلسطینی ریاست کے قیام تک ہتھیار نہیں ڈالے گی۔ یہ بیان امریکی صدر کے مشرق وسطیٰ کے خصوصی ایلچی سٹیو وٹکوف کے اس دعوے کے ردِ عمل میں سامنے آیا ہے جس میں کہا گیا تھا کہ حماس ہتھیار ڈالنے پر آمادہ ہو گئی ہے۔

حماس کا کہنا ہے کہ وہ اسرائیلی دباؤ، امریکی بیانات اور عرب ممالک کی اپیلوں کے باوجود ’مزاحمت اور ہتھیار رکھنے کے حق‘ سے دستبردار نہیں ہوگی جب تک مکمل خودمختار فلسطینی ریاست قائم نہیں ہو جاتی، جس کا دارالحکومت یروشلم ہو۔

یہ پیشرفت ایک ایسے وقت میں ہوئی ہے جب اسرائیل اور حماس کے درمیان جنگ بندی اور یرغمالیوں کی رہائی سے متعلق بالواسطہ مذاکرات تعطل کا شکار ہیں، جبکہ فرانس، کینیڈا اور دیگر مغربی ممالک نے فلسطینی ریاست کو تسلیم کرنے کا اعلان کیا ہے۔