قومی اسمبلی: حکومتی وزرا ٹیکس چوری کے بعد ٹوٹیاں بھی چوری کرنے لگے

اسلام آباد (ڈیلی اردو) پاکستان میں بر سراقتدار رہنے والے کئی وزرا کو ٹیکس چوری کرتے، عوام کے ٹیکس کے پیسوں کو اُڑاتے اور قومی خزانے کو نقصان پہنچاتے دیکھا گیا لیکن حال ہی میں حکومتی وزرا کے حوالے سے ایک شرمناک انکشاف ہوا ہے جس میں یہ بات سامنے آئی کہ حکومتی وزرا ٹوٹیاں بھی چوری کرتے ہیں۔

تفصیلات کے مطابق قائمہ کمیٹی ہاؤسنگ کے اجلاس میں نفیسہ خٹک نے کہا کہ وزرا منیسٹر انکلیو سے رخصت ہوئے اسے نقصان نہ پہنچایا کریں۔

انہوں نے وزرا پر چوری کا الزام عائد کیا اور کہا کہ کچھ وزرا تو ایسے ہیں جو انکلیو سے رخصت ہوتے وقت باتھ روم کی ٹوٹیاں بھی ساتھ توڑ کر لے جاتے ہیں۔ قومی اسمبلی کی قائمہ کمیٹی برائے ہاؤسنگ کا اجلاس گذشتہ روز کمیٹی چیئرمین سمیع الحسن گیلانی کی زیر صدارت پارلیمنٹ ہاؤس میں ہوا تھا جس میں یہ انکشاف سامنے آیا۔

اجلاس میں وزارت ہاؤسنگ کی آئندہ مالی سال کے ترقیاتی منصوبوں پر بریفنگ دی گئی۔ وزارت ہاوسنگ کا کہنا تھا کہ وزیراعظم عمران خان کیمپ آفس گجرخان کی اسکیم پرکام شروع نہیں ہوسکا۔ یہ منصوبہ سابق وزیراعظم راجہ پرویز اشرف کے دور میں منظورکیا گیا تھا۔ جس پر چئیرمین کمیٹی کا کہنا تھا کہ آپ جلد بازی میں منصوبے شروع کردیتے ہیں اسے ڈراپ کردیں۔ کمیٹی اجلاس میں مری اورکہوٹہ کے لیے پانی کی اسکیموں کےمنصوبوں کو مسترد کردیا گیا۔

اجلاس میں وزارت ہاؤسنگ نے بتایا کہ فیڈرل لاجز میں پانی کے مسائل ہیں، ٹینکرز بھی دستیاب نہیں، گھروں کی منٹیننس کے لیے ملازمین کی تنخواہوں سے کاٹا گیا پیسہ حکومتی اکاؤنٹس میں جاتا ہے۔

سیکریٹری ہاؤسنگ کا کہنا تھا کہ منٹیننس کے لیے دی جانے والی حکومتی رقم کا 90 فیصد تنخواہوں میں لگ جاتا ہے، جس پر سمیع الحسن گیلانی نے کہا کہ حکومتی عمارتوں کی حالت خراب ہے منٹیننس کے لیے الگ پیسہ ہونا چاہئیے۔

میڈیا رپورٹ میں بتایا گیا کہ اجلاس کے دوران نفیسہ خٹک کا کہنا تھا کہ مینسٹرز انکلیو کے گھروں کی حالت بہت خراب ہے، مینسٹر انکلیو کے گھروں سے وزرا جاتے ہوئے ٹوٹیاں بھی ساتھ لے جاتے ہیں، یہ لوگ مفت کا مال سمجھ کر سرکاری املاک کو نقصان پہنچاتے ہیں۔

جس پر چیئرمین کمیٹی نے کہا کہ یہ لوگ مفت کا مال سمجھ کر سرکاری املاک کو نقصان پہنچاتے ہیں، وزرا کو جیسا گھر ملا، ویسا ہی چھوڑ کر جائیں، وزرا کا فرض ہے کہ انکلیو کو دوسروں کے لیے قابل استعمال رہنے دیں۔