لاہور میں دہشت گردی کے مقدمات میں ملوث عنصر لودھی مبینہ پولیس ’مقابلے‘ میں ہلاک

لاہور (نمائندہ ڈیلی اردو) صوبہ پنجاب کے صوبائی دارالحکومت  لاہور کے علاقے باغبانپورہ میں پولیس اور نامعلوم مسلح افراد کے درمیان فائرنگ کے تبادلے کے دوران دہشت گردی اور رابری کے متعدد مقدمات میں ملوث انتہائی خطرناک ملزم عنصر لودھی ہلاک ہو گیا۔ 

پولیس کے مطابق وہ اپنے ہی ساتھیوں کی فائرنگ سے مارا گیا، جبکہ مقامی ذرائع نے ڈیلی اردو کو بتایا ہے کہ ملزم کو چند روز قبل گرفتار کیا گیا تھا اور اسے مبینہ پولیس مقابلے میں ہلاک کیا گیا۔

پولیس ذرائع کے مطابق انویسٹی گیشن پولیس ملزم کو بارودی مواد کی برآمدگی کے لیے تھانہ غازی آباد کے علاقے میں لے جا رہی تھی کہ اچانک نامعلوم حملہ آوروں نے اپنے ساتھی کو چھڑوانے کے لیے پولیس پارٹی پر اندھا دھند فائرنگ کر دی، جس کے نتیجے میں عنصر لودھی گولی لگنے سے شدید زخمی ہوا اور اسپتال پہنچنے سے قبل ہی دم توڑ گیا۔

پولیس کے مطابق عنصر لودھی دہشت گردی، خودکش جیکٹ رکھنے، پولیس اہلکاروں پر حملہ کرنے اور متعدد رابری کے مقدمات میں ریکارڈ یافتہ تھا۔ گزشتہ ماہ اسی ملزم نے اے ایس آئی دلاور اور کانسٹیبل عاشق کو فائرنگ کر کے زخمی بھی کیا تھا۔

پولیس نے بتایا کہ فائرنگ کے دوران ایک اہلکار کی بلٹ پروف جیکٹ پر دو گولیاں لگیں تاہم وہ محفوظ رہا، جبکہ سرکاری گاڑی کو شدید نقصان پہنچا۔ ملزم سے اسلحہ اور خودکش جیکٹ بھی برآمد کر لی گئی ہے۔

دوسری جانب مقامی ذرائع نے ڈیلی اردو کو بتایا ہے کہ عنصر لودھی کو چند روز قبل ہی گرفتار کر لیا گیا تھا اور اس کی ہلاکت ایک ’’مبینہ پولیس مقابلہ‘‘ معلوم ہوتی ہے، تاہم اس حوالے سے پولیس کی طرف سے باضابطہ مؤقف سامنے نہیں آیا۔

پولیس نے بتایا کہ ملزم کے دیگر ساتھی اندھیرے کا فائدہ اٹھاتے ہوئے فرار ہو گئے، جن کی گرفتاری کے لیے علاقے میں سرچ آپریشن جاری ہے۔