لاہور میں کالعدم تنظیم کی حمایت پر پنجاب پولیس کا اہلکار گرفتار

لاہور (نمائندہ ڈیلی اردو) پاکستان کے صوبہ پنجاب کے دارالحکومت لاہور میں لاہور پولیس نے کالعدم تحریک لبیک پاکستان کی حمایت میں مواد شیئر کرنے کے الزام میں ڈولفن اہلکار کو گرفتار کر لیا۔

پولیس کے مطابق ڈولفن اسکواڈ کے اہلکار رحمان کو گجرپورہ پولیس نے گرفتار کیا۔ رحمان نے کالعدم تحریک لبیک پاکستان کے حق میں اور مریدکے آپریشن کے خلاف مواد شیئر کیا تھا۔

ڈولفن اہلکار رحمان نے سوشل میڈیا پر مواد شیئر کیا۔ پولیس نے مقدمہ درج کرکے تفتیش شروع کر دی۔

واضح رہے کہ پاکستان کی وفاقی کابینہ نے مذہبی و سیاسی جماعت تحریک لبیک پاکستان کو انسداد دہشتگردی ایکٹ کے تحت کالعدم جماعت قرار دینے کی منظوری دے دی تھی۔

یہ منظوری وزیرِ اعظم شہباز شریف کی سربراہی میں ہونے والے وفاقی کابینہ کے اجلاس میں دی گئی تھی۔ پنجاب حکومت نے 17 اکتوبر کو تحریک لبیک پاکستان پر پابندی کی سفارش کے حوالے سے وفاقی حکومت کو سمری بھیجی تھی۔

ٹی ایل پی نے غزہ امن معاہدہ طے پا جانے کے بعد اسلام آباد میں امریکی سفارتخانے کے سامنے احتجاج کرنے کے لیے لاہور سے اسلام آباد کی جانب 'غزہ مارچ' کا آغاز کیا تھا اور لاہور میں پرتشدد جھڑپوں کے بعد مریدکے کے مقام پر پولیس اور مظاہرین کے مابین دوبارہ شدید جھڑپیں ہوئیں جس کے نتیجے میں ہلاکتیں ہوئیں۔

مریدکے واقعے کے بعد ٹی ایل پی کی قیادت اور کارکنان کے خلاف بڑے پیمانے پر کریک ڈاؤن کا آغاز کیا تھا اور پنجاب پولیس کے مطابق اب تک صوبے بھر سے اس جماعت کے سینکڑوں کارکنان کو گرفتار کیا جا چکا ہے۔