لاہور ہائیکورٹ نے توہینِ مذہب کیس میں سزائے موت پانے والے 4 ملزمان کو بری کردیا

راولپنڈی (ڈیلی اردو) لاہور ہائی کورٹ کے راولپنڈی بینچ نے توہینِ مذہب کیس میں سزائے موت پانے والے چار ملزمان کی اپیلیں منظور کرتے ہوئے انہیں بری کر دیا ہے۔ متعلقہ سیشن کورٹ نے چاروں ملزمان کو سزائے موت کا حکم سنایا تھا۔

عدالتی ریکارڈ کے مطابق ایف آئی اے سائبر کرائم سرکل راولپنڈی نے 12 ستمبر 2022 کو مذکورہ افراد کے خلاف توہینِ ناموسِ رسالت اور پیکا ایکٹ کی دفعات کے تحت مقدمہ درج کیا تھا۔

بعدازاں ٹرائل مکمل ہونے پر سیشن کورٹ نے چاروں ملزمان کو سزائے موت سنائی، جس کے خلاف انہوں نے لاہور ہائی کورٹ میں اپیل دائر کی تھی۔

ہائی کورٹ کے راولپنڈی بینچ نے دونوں فریقین کے دلائل سننے کے بعد سیشن کورٹ کا فیصلہ کالعدم قرار دے دیا اور تمام ملزمان کو بری کرنے کا حکم جاری کر دیا۔