لکی مروت میں سیکیورٹی فورسز کا انٹیلی جنس بیسڈ آپریشن، متعدد ٹی ٹی پی دہشت گرد ہلاک، ٹھکانے تباہ

لکی مروت (نمائندہ ڈیلی اردو) پاکستان کے شورش زدہ صوبہ  خیبرپختونخوا کے ضلع لکی مروت میں سیکیورٹی فورسز نے عزمِ استحکام ویژن کے تحت انٹیلی جنس بیسڈ آپریشن (آئی بی او) کرتے ہوئے کالعدم تحریک طالبان پاکستان (ٹی ٹی پی) کے متعدد دہشت گردوں کو ہلاک کرنے اور ان کے کئی ٹھکانے تباہ کرنے کا اعلان کیا ہے۔

سیکیورٹی ذرائع کے مطابق کارروائی مصدقہ انٹیلی جنس اطلاعات کی بنیاد پر کی گئی، جس کے دوران ٹی ٹی پی کے زیر استعمال متعدد ٹھکانوں کو نشانہ بنایا گیا۔ ذرائع کا کہنا ہے کہ آپریشن میں متعدد دہشت گرد ہلاک ہوئے، تاہم فوری طور پر ان کی تعداد جاری نہیں کی گئی۔

ذرائع کے مطابق کارروائی کے بعد دہشت گردوں کے قبضے سے بھاری مقدار میں اسلحہ، گولہ بارود اور دیگر جنگی سامان برآمد کر کے تحویل میں لے لیا گیا۔

سیکیورٹی ذرائع نے بتایا کہ آپریشن کے دوران کالعدم ٹی ٹی پی سے تعلق رکھنے والے متعدد دیگر دہشت گردوں کے زخمی ہونے کی بھی اطلاعات ہیں، جبکہ فرار ہونے والے دہشت گردوں کی تلاش کے لیے علاقے میں سرچ آپریشن جاری ہے۔

ذرائع کے مطابق کارروائی کے دوران شہریوں کے جان و مال کے تحفظ کو اولین ترجیح دی گئی اور اس امر کو یقینی بنایا گیا کہ مقامی آبادی کو کسی قسم کا نقصان نہ پہنچے۔

سیکیورٹی فورسز کا کہنا ہے کہ خیبرپختونخوا میں پائیدار امن کے قیام، دہشت گردی کے خاتمے اور دہشت گردوں کے نیٹ ورک کو ختم کرنے کے لیے انٹیلی جنس بیسڈ آپریشنز بلا تعطل جاری رہیں گے۔

واضح رہے کہ پاکستان کالعدم تحریک طالبان پاکستان (ٹی ٹی پی) کے ارکان کے لیے سرکاری سطح پر "فتنہ الخوارج" اور "خوارج" کی اصطلاح بھی استعمال کرتا ہے۔