لکی مروت میں پولیس کا آپریشن، ٹی ٹی پی کے دو ماسٹر مائنڈ دہشتگرد ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع لکی مروت میں پولیس نے کارروائی کرتے ہوئے کالعدم تحریک طالبان پاکستان کے دو انتہائی مطلوب دہشتگردوں کو ہلاک کر دیا۔ ہلاک دہشتگردوں کی شناخت محمد سہیل عرف احمد اور عظمت اللّٰہ عرف حافظ کے ناموں سے ہوئی۔

پولیس اور سیکیورٹی حکام کے مطابق دونوں دہشتگرد مختلف دہشتگردانہ کارروائیوں، سیکورٹی فورسز اور پولیس اہلکاروں پر حملوں، ٹارگٹ کلنگ اور دیگر سنگین مقدمات میں ملوث تھے۔ عظمت اللّٰہ ڈی ایس پی گل محمد خان، لیفٹیننٹ عارف اللّٰہ اور کانسٹیبل نسیم گل سمیت آٹھ سیکورٹی اہلکاروں کی ہلاکت میں ملوث تھا، جبکہ محمد سہیل کانسٹیبل منصور خان اور ایل ایچ سی ہاشم خان کی ٹارگٹ کلنگ میں ملوث پایا گیا۔

کارروائی کے دوران دہشتگردوں کے قبضے سے ایک کلاشنکوف بمع دو میگزین، ایک 9 ایم ایم پستول بمع دو میگزین، ایک موبائل فون اور کالعدم تنظیم کے دو کارڈز برآمد ہوئے۔

سی ٹی ڈی بنوں ریجن کی اسپیشل ویپنز اینڈ ٹیکٹکس ٹیمز (SWAT) اور لکی مروت پولیس نے خفیہ اطلاع پر کارروائی کرتے ہوئے دہشتگردوں کو ہلاک کیا۔ حکام کے مطابق دہشتگردوں نے پولیس کو دیکھتے ہی فائرنگ شروع کی، جس کے جواب میں پولیس نے سخت مقابلے کے بعد دونوں دہشتگردوں کو ہلاک کیا۔

عظمت اللّٰہ نے قبل ازیں مسجد میں لیفٹیننٹ عارف اللّٰہ کو نماز پڑھتے ہوئے ہلاک کرنے اور پولیس چوکی عباسہ خٹک پر حملے میں مرکزی کردار ادا کیا تھا۔ دہشتگردوں نے کنسٹیبل فاروق خان، کنسٹیبل اسداللّٰہ اور کنسٹیبل وسیع اللّٰہ کو بھی زخمی کیا تھا۔

انسپکٹر جنرل آف پولیس خیبرپختونخوا نے سی ٹی ڈی اور لکی مروت پولیس کو شاباش دی اور ہدایت کی کہ دیگر اضلاع میں بھی دہشتگردی کے خاتمے کے لیے آپریشنز جاری رکھے جائیں۔ 

یہ کارروائی شمالی وزیرستان اور خیبرپختونخوا میں دہشتگردوں کے خلاف مہم میں ایک اہم کامیابی کے طور پر دیکھی جا رہی ہے اور علاقے میں سیکیورٹی فورسز کی صلاحیت اور دہشتگردوں کے منصوبوں کی ناکامی واضح ہو گئی ہے۔