مردان: زمین کے تنازع پر فائرنگ، ماں اور 3 بیٹوں سمیت 5 افراد جاں بحق

مردان (ڈیلی اردو) صوبہ خیبر پختونخوا کے ضلع مردان کے علاقے گجر گڑھی میں جائیداد کے تنازعے پر فائرنگ کے نتیجے میں ایک ہی خاندان کے 5 افراد جاں بحق ہوگئے۔

تفصیلات کے مطابق گجرگڑھی سے تعلق رکھنے والی ہما گل نے ڈی ایچ کیو ہسپتال کے پولیس کو رپورٹ دیتے ہوئے بتایا کہ آدھی رات کو ان کے رشتہ دار بلال، محمد علی، عثمان شاہ اور طاہر ان کے گھر آئے اور ان کے بھائی آصف سے گھر کے معاملے پر تنازعہ کے بعد فائرنگ شروع کردی۔

انہوں نے بتایا کہ اس فائرنگ کی وجہ سے انکے تین بھائی عابد، ظفرعلی اور آصف، انکی ماں اور 7 مہینے کی ایک بچی زرافشاں جاں بحق ہوگئی۔

پولیس کے مطابق جاں بحق افراد کی لاشیں پوسٹ مارٹم کے لیے ڈی ایچ کیو ہسپتال منتقل کردی گئی ہے جبکہ فائرنگ کا واقعہ 7 مرلے مکان پرتنازعے کے بعد سامنے آیا ہے۔

واردات کے بعد ملزمان فرار ہونے میں کامیاب ہوگئے جن کی گرفتاری کے لیے چھاپوں کا سلسلہ شروع ہے۔ پولیس کے مطابق مقتولین اور قاتل آپس میں چچا زاد بھائی ہے۔