مردان میں امام مسجد قتل، تحریک طالبان پاکستان نے ذمہ داری قبول کرلی

اسلام آباد (ش ح ط) صوبہ خیبر پختونخوا کے ضلع مردان کی تحصیل تخت بھائی میں دہشت گردوں کی فائرنگ سے جامع مسجد کے پیش امام میاں عمر شاہ ولد میاں سید علی شاہ ہلاک ہوگیا۔

پولیس کے مطابق واقعہ گنجئی کلی میں پیش آیا جہاں امام مسجد سے اپنے گھر آرہا تھا کہ راستے میں نامعلوم دو مسلح موٹر سائیکل سوار ملزمان نے کلاشنکوف سے ان پر اندھا دھند فائرنگ کردی جس سے وہ شدید زخمی ہو گیا جس کو فوری طورپر زخمی حالت میں تحصیل ہیڈ کوارٹر ہسپتال تخت بھائی پہنچا دیا گیا حالت تشویشناک ہونے پر ایم ایم سی مردان منتقل کردیا گیا جہاں پر وہ زخموں کی تاب نہ لا کر چل بسا۔

نامعلوم ملزمان رات کی تاریکی میں فرار ہونے میں کامیاب ہو گئے۔ مقتول کے بارے میں معلوم ہوچکا ہے کہ ان کا تعلق ضلع سوات کے علاقہ مٹہ گٹ پیوچارص سے ہے، وہ چند سال قبل تخت بھائی منتقل ہوگیا تھا۔

واقعے کی اطلاع ملتے ہی تخت بھائی پولیس کی بھاری نفری جائے وقوعہ پر پہنچ گئی اور ملزمان کو گرفتار کرنے کے لئے علاقے میں سرچ آپریشن کررہے ہیں۔

دوسری جانب کالعدم تنظیم تحریک طالبان پاکستان (ٹی ٹی پی) نے ذمہ داری قبول کرلی ہے۔

https://twitter.com/ShabbirTuri/status/1380820610071158784?s=19

ٹی ٹی پی ترجمان محمد خراسانی نے اپنے ایک بیان میں کہا ہے کہ امام مسجد سابقہ طالبان کمانڈر میاں عمر شاہ کو قتل کر کے اپنے ‘کمانڈر نیک محمد کی شہادت’ کا بدلہ لیا گیا ہے۔

‏ترجمان نے اپنے بیان میں کہا کہ مذکورہ شخص نے کچھ عرصہ قبل نہ صرف سرنڈر ہوکر پاکستانی فوج کی رٹ کو تسلیم کیا، بلکہ ان کے شانہ بشانہ کھڑے ہوکر طالبان کے خلاف جاسوسی کرنے لگا اور جب کبھی کوئی طالب گرفتار ہوتا تو یہ خفیہ ایجنسی کا آلہ کار ان سے تفتیش کرنے اور ان کو اذیتیں دینے کی ڈیوٹی سنبھالتا رہا۔

ترجمان نے مزید کہا کہ ‏گزشتہ سال میاں عمر شاہ کے بھانجے کو بھی طالبان نے قتل کردیا تھا۔