ملاکنڈ سے داعش کے تین دہشت گرد گرفتار

پشاور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) ملاکنڈ ریجن اور سیکورٹی فورسز نے جنگل شہید کنڈاو اور تھانہ مایار ضلع دیر لوئر میں انٹیلی جنس بنیادوں پر آپریشن کرتے ہوئے کالعدم تنظیم داعش کے تین دہشت گردوں کو گرفتار کرکے بھاری مقدار میں گولہ بارود برآمد کرلیا۔

حکام کے مطابق گرفتار دہشت گردوں میں عبدالرحمان ولد عبد الخالق ساکن مسلم آباد جبگئی لعل قلعہ دیر لوئر، عزیز النبی ولد مختیار النبی ساکن با ڈوان دربار دیر لوئر اور فضل قاسم ولد فضل الرحمان ساکن گل مقام چکدرہ دیر لوئر شامل ہیں۔

دہشتگردوں کے قبضے سے تین ہینڈ گرنیڈز، دو عدد پستول 30 بور بمعہ 10 عدد کارتوس، 02 کلو 520 گرام بارود، 08 عدد ڈیٹونیٹرز، برائما کارڈ 14 فٹ، 03 عدد RPG7 کے گولے برآمد کئے گئے ہیں۔

گرفتار دہشت گردوں کے خلاف انسداد دہشت گردی ایکٹ سال 1997 کے تحت دہشت گردی کا مقدمہ در ج کرکے ماہر تفتیش ٹیم مقرر کی گئی ہے۔

ادھر ایک اور کارروائی میں سی ٹی ڈی مالاکنڈ ریجن کو دہشت گردی کے مقدمہ میں مطلوبہ مجرم اشتہاری محمد شعیب ولد کاکی ساکن سمبٹ چم مٹہ سوات کو بھی گرفتار کرلیاگیاہے۔