موجودہ ایرانی قیادت اپنے ’انجام کے قریب‘ پہنچ چکی ہے، جرمن چانسلر

برلن (ڈیلی اردو/اے ایف پی) جرمن چانسلر فریڈرش میرس نے کہا ہے کہ ایرانی حکومت اپنی رِٹ کھو چکی ہے اور موجودہ قیادت اپنے ’’انجام کے قریب‘‘ پہنچ چکی ہے۔ ان کا کہنا تھا کہ دسمبر کے آخر سے ایران میں جاری بڑے پیمانے کے احتجاجی مظاہروں کے دوران ریاستی کریک ڈاؤن نے حکومت کی کمزوری کو بے نقاب کر دیا ہے۔

جرمن چانسلر نے منگل کو بھارت کے شہر بنگلورو کے دورے کے دوران کہا،’’اگر کوئی حکومت صرف تشدد کے ذریعے اقتدار میں رہنے کی کوشش کرے، تو وہ عملی طور پر ختم ہو چکی ہوتی ہے۔‘‘

انہوں نے مزید کہا،’’میرا یقین ہے کہ ہم شاید اس حکومت کے آخری دنوں اور ہفتوں کا مشاہدہ کر رہے ہیں۔‘‘

فریڈرش میرس نے گزشتہ برس جون میں ایران پر اسرائیل کی بمباری مہم کے تناظر میں یہ بھی کہا تھا کہ’’اسرائیل ہمارے لیے ’ڈرٹی ورک‘ کر رہا ہے۔‘‘

ان کے اس بیان کو ایران میں تھیوکریٹک نظام کے خاتمے سے متعلق ان کی امید کے تناظر میں دیکھا گیا تھا۔

جرمن چانسلر ایران میں پرامن مظاہرین کے خلاف سکیورٹی فورسز کی کارروائی کو ’’غیر متناسب‘‘ اور ’’وحشیانہ‘‘ قرار دیتے ہوئے اس کی شدید مذمت بھی کر چکے ہیں۔

ایران 28 دسمبر سے شدید احتجاجی لہر کی لپیٹ میں ہے، جسے کئی برسوں بعد حکومت مخالف سب سے بڑا احتجاج قرار دیا جا رہا ہے۔

یہ مظاہرے ابتدا میں دکان داروں کی جانب سے ایرانی کرنسی ریال کی قدر میں نمایاں کمی اور بڑھتی ہوئی معاشی مشکلات کے خلاف شروع ہوئے، جو دیکھتے ہی دیکھتے ملک گیر تحریک میں تبدیل ہو گئے۔

ایران میں انسانی حقوق کے کارکنوں کے مطابق، مظاہروں کو کچلنے کے لیے سکیورٹی فورسز نے پرتشدد طریقے اپنائے، جن میں آنسو گیس اور براہِ راست فائرنگ کا استعمال بھی شامل ہے۔