مہمند میں سیکیورٹی فورسز کا آپریشن، ٹی ٹی پی کے 5 شدت پسند اور3 اہلکار ہلاک

غلنئی (نمائندہ ڈیلی اردو)پاکستان کے صوبہ خیبر پختونخوا کے قبائلی ضلع مہمند کے علاقے صافی میں پاکستانی سیکیورٹی فورسز کے ایک آپریشن کے دوران کالعدم تحریک طالبان پاکستان (ٹی ٹی پی) کے 5 عسکریت پسند ہلاک ہو گئے۔

سیکیورٹی ذرائع کے مطابق، فورسز کو علاقے میں شدت پسندوں کی موجودگی کی اطلاع ملی تھی، جس کے بعد فرنٹیئر کور (ایف سی) نے چھاپہ مارا۔ آپریشن کے دوران دونوں جانب سے شدید فائرنگ کا تبادلہ ہوا، جس میں 5 شدت پسند مارے گئے جبکہ 3 ایف سی اہلکار بھی ہلاک ہو گئے۔

ذرائع کے مطابق، ہلاک ہونے والے عسکریت پسند مہمند میں سیکیورٹی فورسز اور شہریوں پر حملوں میں ملوث تھے۔ آپریشن کے بعد علاقے میں مزید سرچ آپریشن جاری ہے تاکہ کسی بھی ممکنہ شدت پسند کو پکڑا جا سکے۔

حکام نے اس آپریشن کو دہشت گردوں کے خلاف جاری کارروائیوں کا تسلسل قرار دیتے ہوئے کہا ہے کہ ملک میں امن و استحکام کو یقینی بنانے کے لیے ایسی کارروائیاں جاری رہیں گی۔