نائجیریا: حریف جہادی گروہوں کے درمیان جھڑپوں میں 200 افراد ہلاک

ابوجا (ڈیلی اردو) نائجیریا کے شمال مشرقی علاقے جھیل چاڈ کے بیسن میں حریف جہادی گروہوں کے درمیان شدید جھڑپوں میں تقریباً 200 افراد ہلاک ہو گئے ہیں۔ 

سیکیورٹی اور مقامی ملیشیا ذرائع کے مطابق یہ لڑائی اتوار کے روز ڈوگون چیکو کے قریب اُس وقت شروع ہوئی جب بوکو حرام اور داعش سے منسلک گروپ ’اسلامک اسٹیٹ صوبہ ویسٹ افریقہ‘ (ISWAP) کے درمیان علاقے پر قبضے اور نظریاتی اختلافات کے تناظر میں جھڑپیں ہوئیں۔

ذرائع کے مطابق ہلاک ہونے والوں میں زیادہ تر ISWAP کے جنگجو شامل ہیں۔ ایک نائجیرین انٹیلیجنس اہلکار نے دعویٰ کیا ہے کہ کم از کم 150 ہلاکتوں کی تصدیق ہو چکی ہے، جسے حکومت کی جانب سے دونوں شدت پسند گروہوں کی کمزوری قرار دے کر ’’مثبت پیش رفت‘‘ کے طور پر دیکھا جا رہا ہے۔

بوکو حرام اور ISWAP کے درمیان اختلافات 2016 میں اُس وقت سامنے آئے تھے جب داعش سے وفاداری کے معاملے پر دونوں تنظیمیں تقسیم ہو گئیں۔ دونوں گروپ جھیل چاڈ کے سرحدی علاقے پر کنٹرول کے لیے مسلسل برسرِ پیکار ہیں، جو نائجیریا، نائجر، چاڈ اور کیمرون کے درمیان واقع ہے اور شدت پسندوں کی نقل و حرکت اور مالی وسائل کی فراہمی کے لیے اہم سمجھا جاتا ہے۔

واضح رہے کہ یہ دونوں گروہ خطے میں مسیحی برادری اور عام شہریوں کے خلاف پرتشدد حملوں میں ملوث رہے ہیں۔ حالیہ دنوں میں امریکہ نے نائجیریا میں مذہبی اقلیتوں کے تحفظ کے لیے ان گروہوں کے خلاف عسکری کارروائی کی دھمکی بھی دی تھی۔