ننکانہ صاحب: بدبخت بیٹے نے ماں، بہن، بیوی اور بھابھی کو قتل کر دیا

ننکانہ صاحب (ڈیلی اردو) صوبہ پنجاب کے ضلع ننکانہ صاحب کی تحصیل شاہ کوٹ میں بیٹے نے ماں، بیوی، بہن اور بھابھی کو تیز دھار آلے کی مدد سے قتل کر دیا۔

پنجاب پولیس کے مطابق شاہ کوٹ کی بسم اللہ گلشن کالونی میں ایک گھر ہی کی 4 خواتین کو قتل کیا گیا، شبہ ہے کہ بیٹے نے ماں بیوی، بہن اور بھابھی کو تیز دھار آلہ سے قتل کیا۔

پولیس کا کہنا ہے کہ ملزم موقع سے فرار ہے جس کی تلاش کے لیے چھاپے مارے جا رہے ہیں، لاشوں کو پوسٹ مارٹم کے لیے مقامی ہسپتال منتقل کر دیا گیا ہے جبکہ جائے واردات سے شواہد اکٹھے کر کے تفتیش بھی شروع کر دی گئی ہے۔

دوسری طرف وزیراعلیٰ پنجاب سردار عثمان بزدار نے شاہ کوٹ کے علاقے میں 4 خواتین کے قتل کے واقعہ کا نوٹس لیتے ہوئے آر پی او شیخوپورہ سے رپورٹ طلب کر لی اور ملزم کی جلد گرفتار کرنے کا حکم دیدیا۔

وزیراعلیٰ کا کہنا تھا کہ افسوسناک واقعہ میں ملوث ملزم کسی رعایت کے مسحق نہیں۔ خصوصی ٹیمیں تشکیل دے کر ملزم کو قانون کی گرفت میں لایا جائے۔ قتل ہونے والی خواتین کے لواحقین کو انصاف کی فراہمی یقینی بنائی جائے۔