نوشکی: بلوچ عسکریت پسندوں کے ہاتھوں سڑک تعمیر کرنے والے 4 مزدور اغوا

کوئٹہ (ڈیلی اردو) بلوچستان کے ضلع نوشکی کے علاقے البت میں مبینہ طور پر بلوچ عسکریت پسندوں نے سڑک کی تعمیر میں مصروف 4 مزدوروں کو اغوا کر لیا۔

لیویز ذرائع کے مطابق مغوی مزدور نوشکی-خاران شاہراہ پر کام کر رہے تھے کہ اچانک مسلح افراد نے حملہ کیا اور انہیں زبردستی اپنے ساتھ لے گئے۔ حملہ آوروں نے تعمیراتی مشینری پر بھی فائرنگ کی، جس سے مشینری کو معمولی نقصان پہنچا۔

ذرائع کے مطابق اغوا کیے گئے مزدوروں میں تین کا تعلق پشتون برادری سے ہے جبکہ ایک مزدور مستونگ سے ہے۔ سیکیورٹی فورسز نے واقعے کے بعد علاقے میں سرچ آپریشن شروع کر دیا ہے اور مغویوں کی بازیابی کے لیے کوششیں جاری ہیں۔

تاحال کسی گروہ نے اغوا کی ذمہ داری قبول نہیں کی، تاہم حکام کا شبہ ہے کہ اس واقعے میں بلوچ عسکریت پسند ملوث ہو سکتے ہیں، جو ماضی میں بھی ترقیاتی منصوبوں کو نشانہ بناتے رہے ہیں۔