پاکستان میں دہشت گرد کارروائیوں میں بھارت کا ہاتھ واضح ہے، وزیراعظم شہباز شریف

اسلام آباد (نمائندہ ڈیلی اردو) وزیراعظم پاکستان شہباز شریف نے کہا ہے کہ پاکستان میں ہونے والی دہشت گرد کارروائیوں میں بھارت کا ہاتھ بالکل واضح ہے، جبکہ افغان حکومت دہشت گردوں کو روکنے میں ناکام رہی ہے۔ انہوں نے کہا کہ پاکستان دہشت گردی کے مکمل خاتمے کے لیے اپنی کوششیں جاری رکھے گا۔

بلوچستان نیشنل ورکشاپ کے شرکا سے خطاب کرتے ہوئے وزیراعظم شہباز شریف نے کہا کہ بلوچستان جغرافیائی لحاظ سے پاکستان کا سب سے بڑا جبکہ آبادی کے لحاظ سے سب سے چھوٹا صوبہ ہے۔ 

انہوں نے کہا کہ بلوچستان کی قیادت نے ہمیشہ ذاتی معاملات کو بالائے طاق رکھتے ہوئے وفاق پاکستان کی حمایت کی ہے، جبکہ بلوچستان کے عوام نے پاکستان کے قیام میں اہم کردار ادا کیا۔

وزیراعظم نے دہشت گردی کے خلاف جنگ کا ذکر کرتے ہوئے کہا کہ اس جنگ میں پاکستان کے 90 ہزار شہری اور سکیورٹی فورسز کے اہلکار ہلاک ہو چکے ہیں۔ انہوں نے حالیہ مستونگ واقعے کا حوالہ دیتے ہوئے کہا کہ گزشتہ روز ایک سیشن جج کو ہلاک کیا گیا، تاہم بلوچستان کے عوام اور سکیورٹی اداروں کی قربانیاں رائیگاں نہیں جائیں گی۔

شہباز شریف نے الزام عائد کیا کہ پاکستان میں دہشت گرد کارروائیوں میں بھارت کا کردار واضح ہے، جبکہ افغان حکومت دہشت گرد عناصر کو روکنے میں مکمل طور پر ناکام رہی ہے۔ ان کا کہنا تھا کہ پاکستان اپنے ہمسایہ ملک کو بھی اس معاملے پر سمجھانے کی کوشش کر رہا ہے۔

انہوں نے کہا کہ پاکستان میں دہشت گردی ایک وقت میں مکمل طور پر ختم ہو چکی تھی، تاہم ایک منظم سازش کے تحت دہشت گردی دوبارہ واپس آئی۔ وزیراعظم نے کہا کہ دہشت گردی کا مقابلہ پوری قوم کو متحد ہو کر کرنا ہوگا۔

شہباز شریف نے کہا کہ اب وقت آ گیا ہے کہ پاکستان کو ترقی کی دوڑ میں آگے لے جایا جائے۔ انہوں نے کہا کہ ملک کی ترقی کے لیے چاروں صوبوں کی یکساں کوششیں ضروری ہیں۔

وزیراعظم نے مزید کہا کہ پاکستان کو حالیہ دنوں میں اہم کامیابیاں حاصل ہوئی ہیں۔ انہوں نے فیلڈ مارشل عاصم منیر اور نائب وزیراعظم و وزیر خارجہ اسحاق ڈار کی کوششوں کو سراہتے ہوئے کہا کہ خطے میں امن کے لیے پاکستان کی سفارتکاری کو عالمی سطح پر قدر کی نگاہ سے دیکھا جا رہا ہے۔