پاکستان میں فرقہ وارانہ ٹارگٹ کلنگ کا دوبارہ خدشہ

واشنگٹن (ش ح ط) ایک اعلیٰ پاکستانی سول انٹلی جنس افسر نے نام ظاہر نہ کرنے کی شرط پر ڈیلی اردو کو بتایا کہ آئندہ دنوں میں ملک میں شیعہ ٹارگٹ کلنگ کا سلسلہ دوبارہ شروع ہوسکتا ہے۔

افسر کے مطابق گزشتہ چند سالوں میں پاکستان میں فرقہ وارانہ ٹارگٹ کلنگ کے واقعات میں واضح کمی آئی تھی، تاہم ایران سے منسلک بعض تنظیموں کی جانب سے اپنے مخالف گروہوں کے خلاف کارروائیاں جاری ہیں، جس کے باعث سنی گروہوں کو بھی موقع مل گیا ہے کہ وہ شیعہ کمیونٹی سے تعلق رکھنے والے افراد کو نشانہ بنائیں۔

انٹلی جنس ذرائع کے مطابق لشکر جھنگوی دوبارہ متحرک ہو گئی ہے اور خدشہ ہے کہ آئندہ دنوں میں ملک میں شیعہ سنی ٹارگٹ کلنگ کے واقعات میں اضافہ ہو سکتا ہے۔ سکیورٹی ادارے اس نیٹ ورک کو توڑنے کے لیے سرگرم ہیں اور متعدد مشتبہ افراد کو گرفتار بھی کیا جا چکا ہے۔

اعلیٰ افسر نے انکشاف کیا کہ کالعدم اہلسنت والجماعت، لشکر جھنگوی اور سپاہ صحابہ کے کارکنان کے خلاف حالیہ ٹارگٹ کلنگ میں زینبیون بریگیڈ، مہدی فورس اور نئی ابھرتی ہوئی تنظیم لشکرِ ثاراللہ کے کارندے ملوث ہیں۔ متعدد افراد کو حراست میں لیا جاچکا ہے اور مزید گرفتاریاں متوقع ہیں۔

انٹلی جنس حکام کے مطابق بعض سنی عسکریت پسندوں کا نیٹ ورک شام سے آپریٹ کر رہا ہے، جبکہ شیعہ عسکری گروہوں کا نیٹ ورک ایران سے چلایا جا رہا ہے۔

افسر نے مزید انکشاف کیا کہ انٹلی جنس ایجنسیوں نے متعلقہ سیکیورٹی اداروں کو خط لکھ کر ہدایات جاری کی ہیں کہ ملک میں اہم شیعہ اور سنی شخصیات کی حفاظت کو یقینی بنایا جائے۔ خط میں خاص طور پر تاکید کی گئی ہے کہ یہ شخصیات کسی بھی ممکنہ ٹارگٹ کلنگ یا حملے سے محفوظ رہیں اور ان کے گرد مناسب سکیورٹی انتظامات کیے جائیں۔

افسر نے بتایا کہ پاکستان نے ایران سے مطلوب دہشت گردوں کی گرفتاری اور حوالگی کا بھی باضابطہ مطالبہ کیا ہے۔

واضح رہے کہ لشکرِ ثاراللہ اور مہدی فورس بھی زینبیون بریگیڈ سے وابستہ ہیں اور ٹارگٹ کلنگ کی متعدد وارداتوں میں ملوث رہی ہیں۔

ماضی میں شیعہ سنی ٹارگٹ کلنگ کے نتیجے میں ہزاروں افراد ہلاک ہو چکے ہیں۔