پشاور اور کرک میں سیکورٹی فورسز کے اہلکاروں کی ٹارگٹ کلنگ

کرک/پشاور (نمائندگان ڈیلی اردو)  پاکستان کے شورش زدہ صوبے خیبر پختونخوا کے ضلع کرک اور پشاور میں دو الگ الگ مسلح حملوں میں سیکیورٹی اہلکاروں کو نشانہ بنایا گیا۔

کرک کے علاقے تپی میں نامعلوم مسلح افراد نے فائرنگ کرکے ایلیٹ فورس کے اہلکار سجاد کو ہلاک کر دیا۔ پولیس کے مطابق سجاد ایلیٹ فورس میں تعینات تھا اور بنوں میں ڈیوٹی انجام دے رہا تھا۔ اہلکار کچھ روز کی چھٹی پر اپنے گھر آیا ہوا تھا جب اسے ٹارگٹ کلنگ کا نشانہ بنایا گیا۔ حملہ آور فائرنگ کے بعد موقع سے فرار ہونے میں کامیاب ہو گئے۔ 

واقعے کے بعد پولیس اور سیکیورٹی فورسز نے علاقے کا محاصرہ کر کے سرچ آپریشن شروع کر دیا ہے اور جائے وقوعہ سے شواہد اکٹھے کیے جا رہے ہیں۔

پولیس حکام کے مطابق ابتدائی طور پر اسے ٹارگٹ کلنگ قرار دیا جا رہا ہے، تاہم حملے کے محرکات جاننے کے لیے تحقیقات جاری ہیں۔ ہلاک ہونے والے اہلکار کی میت قانونی کارروائی کے بعد ورثا کے حوالے کر دی گئی ہے، جبکہ پوسٹ مارٹم رپورٹ کا انتظار ہے۔

مقامی ذرائع کے مطابق حالیہ مہینوں میں کرک اور ملحقہ اضلاع میں دہشت گردی کے واقعات میں نمایاں اضافہ ہوا ہے۔

اسی دوران پشاور میں بھی فیڈرل کانسٹیبلری کے اہلکار پر نامعلوم افراد نے فائرنگ کی۔ پولیس کے مطابق یہ واقعہ تھانہ ریگی کی حدود میں پیش آیا، جہاں دو نامعلوم موٹر سائیکل سواروں نے ایف سی اہلکار انتظار پر حملہ کیا۔ اہلکار کو تشویشناک حالت میں خیبر ٹیچنگ اسپتال منتقل کیا گیا، جہاں ان کی حالت نازک بتائی گئی ہے۔

سیکیورٹی ذرائع کے مطابق کرک اور پشاور دونوں میں ہونے والے یہ حملے دہشت گردی کی بڑھتی ہوئی وارداتوں کا حصہ ہیں، اور سیکیورٹی ادارے واقعے میں ملوث عناصر کے سراغ کے لیے بھرپور کارروائیاں کر رہے ہیں۔