پشاور: ایف سی ہیڈ کوارٹرز پر حملہ؛ خودکش حملہ آوروں کی افغان شہریت کی تصدیق

پشاور (نمائندہ ڈیلی اردو) پاکستان کے شورش زدہ صوبے خیبر پختونخوا کے دارالحکومت پشاور میں فرنٹیئر کور (ایف سی) ہیڈ کوارٹرز پر 24 نومبر کو ہونے والے دھماکے کی تحقیقات جاری ہیں۔ تفتیشی حکام کا کہنا ہے کہ نادرا نے تینوں حملہ آوروں کی افغان شہریت کی تصدیق کردی ہے۔

حکام نے ابتدائی تحقیقات کے بعد تصدیق کی ہے کہ حملہ کرنے والے خودکش دہشت گرد افغان شہریت کے حامل تھے۔ سیکیورٹی حکام کے مطابق، یہ حملہ مقامی اور بین الاقوامی دہشت گرد نیٹ ورکس کے ممکنہ روابط کی نشاندہی کرتا ہے۔

پاکستانی تفتیشی حکام کے مطابق نادرا کو حملہ آوروں کی مزید تفصیلات تاحال موصول نہیں ہوئیں، دھماکے سے متعلق اب تک 100 سے زیادہ مشتبہ افراد سے تفتیش کی جاچکی ہے

حملہ آوروں کی رحمان بابا قبرستان سے فیڈرل کانسٹیبلری ہیڈکوارٹرز تک آمد کی فوٹیج بھی حاصل کرلی گئی ہے، تفتیشی ٹیم سہولت کار کا کھوج لگانے میں مصروف ہے۔ 

واضح رہے کہ 24 نومبر کو فیڈرل کانسٹیبلری ہیڈکوارٹرز میں خودکش دھماکے میں 3 اہلکار ہلاک اور متعدد افراد زخمی ہوئے تھے، جوابی کارروائی میں تینوں دہشت گرد مارے گئے تھے۔