پشاور: فیڈرل کانسٹیبلری ہیڈ کوارٹر پر خودکش حملہ، 5 اہلکار اور 2 حملہ آور ہلاک، متعدد زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے دارالحکومت پشاور میں صدر کے علاقے میں واقع فیڈرل کانسٹیبلری (ایف سی) ہیڈ کوارٹر پر دہشتگردوں نے حملہ کر دیا۔ ابتدائی اطلاعات کے مطابق ہیڈ کوارٹر میں دو زور دار دھماکوں کی آوازیں سنی گئیں جس کے بعد شدید فائرنگ کا سلسلہ شروع ہو گیا۔

پولیس حکام نے ڈیلی اردو کو بتایا ہے کہ خودکش حملے میں کم از کم 5 اہلکار ہلاک اور 3 اہلکاروں سمیت 9 افراد زخمی ہوئے ہیں۔

ڈیلی اردو کو خودکش دھماکے کی سی سی ٹی وی فوٹیج موصول ہوئی ہے، جس میں دھماکے کے فوراً بعد مین گیٹ کے ساتھ دھوئیں کے بادل اٹھتے ہوئے واضح طور پر دیکھے جا سکتے ہیں۔

سی سی ٹی وی فوٹیج کے مطابق سفید رنگ کی کار میں سوار خودکش بمبار نے صبح 8 بجکر 11 منٹ پر خود کو اُڑایا۔

آئی جی خیبر پختونخوا پولیس ذوالفقار حمید نے صحافیوں کو بتایا کہ ہیڈ کوارٹر میں دو خودکش دھماکے ہوئے،  ایک مین گیٹ پر جبکہ دوسرا موٹر سائیکل اسٹینڈ پر، جو گیٹ کے اندر ہی واقع ہے۔ ان کے مطابق دو حملہ آور فائرنگ کے تبادلے میں مارے جا چکے ہیں اور پولیس کی ٹیمیں جائے وقوعہ پر موجود ہیں، جہاں کلیئرنس آپریشن جاری ہے۔

سی پی او پشاور ڈاکٹر میاں سعید نے بھی تصدیق کی کہ حملہ خودکش نوعیت کا تھا اور ایف سی ہیڈ کوارٹر کو نشانہ بنایا گیا۔ انہوں نے بتایا کہ حملہ آوروں کے دو سے تین ساتھی دھماکوں اور فائرنگ کے بعد ہیڈ کوارٹر کے اندر داخل ہو گئے تھے، جن کی تلاش اور مقابلہ جاری ہے۔

ریسکیو 1122 کے ترجمان کے مطابق دھماکوں کی اطلاع ملتے ہی ریسکیو اہلکار اور ایمبولینسز فوری طور پر موقع پر پہنچ گئیں، جبکہ زخمیوں کو قریبی اسپتال منتقل کیا جا رہا ہے۔ علاقے کو گھیرے میں لے کر داخلی راستے بند کر دیے گئے ہیں۔

سکیورٹی حکام کے مطابق کلیئرنس مکمل ہونے کے بعد دھماکوں کی نوعیت اور ہلاکتوں و زخمیوں کی حتمی تعداد سے متعلق مزید معلومات فراہم کی جائیں گی۔