پشاور میں موٹر سائیکل سواروں کی فائرنگ سے انٹیلیجنس بیورو کا انسپکٹر ہلاک

واشنگٹن (ش ح ط) پاکستان کے صوبہ خیبر پختونخوا کے دارالحکومت پشاور میں خفیہ ادارے انٹیلیجنس بیورو کے انسپکٹر کو شدت پسندوں نے فائرنگ کرکے ہلاک کردیا ہے۔

یہ واقعہ بروز بدھ کو دوپہر دو بجے کے قریب عزیر ٹاون میں پیش آیا ہے جو مچنی گیٹ تھانے کی حدود میں ہے۔

پولیس حکام کا کہنا ہے کہ ورسک روڈ پر عزیر ٹاون کے قریب نامعلوم موٹر سائیکل سواروں نے شاہد انور کی گاڑی پر اندھا دھند فائرنگ شروع کر دی۔

حملہ آور فائرنگ کے بعد فرار ہونے میں کامیاب ہوگئے۔ جبکہ پولیس نے جائے وقوع سے شواہد جمع کر کے تفتیش شروع کر دی ہے۔

تاحال کسی گروہ یا تنظیم نے اس حملے کی ذمہ داری قبول نہیں کی ہے۔

واقعہ کی اطلاع ملتے ہی پولیس اور حساس اداروں کی بھاری نفری جائے وقوع پر پہنچ گئی اور علاقے کو گھیرے میں لے لیا۔

خیبر پختونخوا کے وزیرِ اعلی سردار علی امین گنڈا پور اور گورنر فیصل کریم کنڈی نے اس واقعہ کا نوٹس لیتے ہوئے انسپکٹر جنرل پولیس سے رپورٹ طلب کر لی ہے۔

پاکستان کے وزیر داخلہ محسن نقوی نے بھی مذمت کرتے ہوئے مقتول افسرکے اہل خانہ سے تعزیت کا اظہار بھی کیا ہے۔

انسپکٹر شاہد انور کو ضلع کوہاٹ کے نواحی علاقے شکردرہ میں سرکاری اعزاز کے ساتھ سپرد خاک کردیا گیا۔

حالیہ مہینوں کے دوران پاکستان میں عسکریت پسندوں کے حملوں میں اضافہ دیکھا گیا ہے اور ان میں سے زیادہ تر کا الزام پاکستانی طالبان پر عائد کیا جاتا ہے، جنہیں تحریک طالبان پاکستان یا ٹی ٹی پی بھی کہا جاتا ہے۔