پنجاب حکومت کا بڑا اقدام، کالعدم تحریک لبیک پاکستان کے تمام اثاثے منجمد کرنے کا حکم

لاہور (نمائندہ ڈیلی اردو) پنجاب حکومت نے کالعدم تحریک لبیک پاکستان (ٹی ایل پی) کی تمام جائیدادیں اور اثاثے منجمد کرنے کے احکامات جاری کر دیے ہیں۔ محکمہ داخلہ پنجاب نے صوبے بھر میں ٹی ایل پی کے نام پر موجود جائیدادوں اور اثاثوں کی تفصیلات طلب کر لی ہیں۔

محکمہ داخلہ کے مطابق صوبے بھر سے تمام اضلاع کو ہدایت کی گئی ہے کہ ٹی ایل پی کے نام پر رجسٹرڈ جائیدادوں اور اثاثوں کی تفصیلی رپورٹ 15 نومبر تک جمع کرائی جائے۔

یہ فیصلہ چیئرمین سب کیبنٹ کمیٹی برائے امن و امان خواجہ سلمان رفیق کی زیرِ صدارت اجلاس میں کیا گیا۔ اجلاس کے بعد سیکرٹری داخلہ ڈاکٹر احمد جاوید قاضی نے تمام کمشنرز، ڈپٹی کمشنرز، بورڈ آف ریونیو، سیکرٹری ہاؤسنگ، سیکرٹری کوآپریٹو اور متعلقہ اداروں کو باضابطہ ہدایات جاری کر دیں۔

محکمہ داخلہ کے مطابق تحریک لبیک پاکستان کو پہلے ہی انسدادِ دہشت گردی ایکٹ کے تحت کالعدم قرار دیا جا چکا ہے، اور اب اس کے تمام مالی و غیر مالی اثاثے منجمد کرنے کا عمل باضابطہ طور پر شروع کر دیا گیا ہے۔