پنجاب : میانوالی میں شدت پسندوں کی کارروائیاں، دو شہری اغوا

واشنگٹن (ش ح ط) صوبہ پنجاب کے ضلع میانوالی میں کالعدم تنظیم تحریک طالبان پاکستان (ٹی ٹی پی) کے شدت پسندوں نے مختلف مقامات پر چیک پوسٹیں قائم کرکے دو مقامی افراد کو اغوا کر لیا۔

مقامی و سرکاری ذرائع کے مطابق شدت پسندوں نے ضلع کے علاقوں کرندی اور مَلہ خیل میں غیرقانونی چیک پوسٹیں قائم کیں، جہاں شناختی کارڈز کی جانچ کے بعد کرندی سے سعد اللہ ولد کرامت خان اور مَلہ خیل سے شفقت ولد حیات اللہ کو اسلحے کے زور پر اغوا کر کے نامعلوم مقام پر منتقل کر دیا گیا۔

یہ واقعہ ایک ایسے وقت میں پیش آیا ہے جب ایک ہفتہ قبل پنجاب ہی کے ضلع ڈیرہ غازی خان سے تین فوجی اہلکاروں کو شدت پسندوں نے اغوا کیا تھا، جنہیں بعد ازاں رہا کر دیا گیا تھا۔

میانوالی جیسے حساس ضلع میں اس نوعیت کی کارروائیاں سیکیورٹی خدشات کو مزید بڑھا رہی ہیں۔ مقامی انتظامیہ نے سرچ آپریشن شروع کر دیا ہے تاہم مغوی افراد کی موجودگی کے بارے میں تاحال کوئی معلومات سامنے نہیں آ سکی ہیں۔