پنجاب میں سی ٹی ڈی کا انٹیلی جنس بیسڈ آپریشن، 13 دہشت گرد گرفتار

لاہور (بیورو رپورٹ) دہشت گردی کے خدشات کے پیش نظر کاؤنٹر ٹیررازم ڈیپارٹمنٹ (سی ٹی ڈی) پنجاب نے مختلف شہروں میں کارروائیاں کرتے ہوئے انٹیلی جنس بیسڈ آپریشن کے دوران 13 دہشت گرد گرفتار کرلیے۔

سی ٹی ڈی نے لاہور، اٹک، بہاولنگر، جہلم، بہاولپور، شیخوپورہ اور راولپنڈی میں کارروائیاں کرتے ہوئے انٹیلی جنس بیسڈ آپریشن کے دوران 13 دہشت گرد گرفتار کرلیے۔#Terrorism #CTD #Punjab #Pakistan

— Shabbir Hussain Turi (@ShabbirTuri) September 23, 2023

ترجمان سی ٹی ڈی کے مطابق کارروائیاں لاہور، اٹک، بہاولنگر، جہلم، بہاولپور، شیخوپورہ اور راولپنڈی میں کی گئیں، اٹک سے 5 اور لاہور سے 3 دہشت گرد گرفتار کیے گئے ہیں۔

سی ٹی ڈی کے مطابق دہشت گردوں کے قبضے سے تقریباً 5 کلو دھماکا خیز مواد، آئی ای ڈی بم، ڈیٹونیٹرز، حفاظتی فیوز وائر، پرائما کارڈز، پستول اور گولیاں، ایس ایم جی رائفل اور 80 گولیاں، کالعدم تنظیم کے پمفلٹس، اسٹیکرز، موبائل فون اور نقدی برآمد کی گئی۔

ترجمان کا کہنا ہے کہ گرفتار دہشت گردوں میں خورشید، عبدالرشید، عرفان اللہ، لقمان خان، وحید خان، رضوان اللہ، محمد عامر، شیخ محمد، عامر اسماعیل، محمد رحمان، واجد رمضان، الہام الدین اور محمد اسامہ شامل ہیں، جن کا تعلق کالعدم تنظیموں تحریک طالبان پاکستان، داعش، تحریک جعفریہ پاکستان اور لشکر جھنگوی سے ہے۔

ترجمان سی ٹی ڈی کا کہنا ہے کہ دہشت گرد سرکاری دفاتر اور اہم تنصیبات پر حملے کی منصوبہ بندی کر رہے تھے، دہشت گردوں کے خلاف مقدمات درج کرکے مزید تفتیش جاری ہے۔

ترجمان نے بتایا کہ رواں ہفتے مقامی پولیس اور سیکیورٹی اداروں کی مدد سے سی ٹی ڈی پنجاب نے 625 کومبنگ آپریشنز کئے، اس کومبنگ آپریشنز میں 27229 افراد سے پوچھ گچھ کی گئی۔ ان دوران 105 مشتبہ افراد کو گرفتار کرکے 101 ایف آئی آر درج کی گئیں۔

گرفتار دہشت گردوں کے خلاف 8 ایف آئی آر درج کرکے تفتیش کیلئے نامعلوم مقام پر منتقل کردیا گیا۔

ترجمان کا کہنا ہے کہ سی ٹی ڈی محفوظ پنجاب کے ہدف پر عمل پیرا ہے، دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔