چھ ماہ میں 6 جنگوں کا تصفیہ، یوکرین تنازع کا حل میری ترجیح، امریکی صدر ٹرمپ

واشنگٹن (ڈیلی اردو) امریکی صدر ڈونلڈ ٹرمپ نے سماجی رابطے کی ویب سائٹ ٹروتھ سوشل پر ایک بیان میں کہا ہے کہ انہوں نے چھ ماہ میں چھ جنگوں کا تصفیہ کیا، جن میں سے ایک ایٹمی جنگ میں بدل سکتی تھی۔

ٹرمپ نے مزید کہا کہ ’اس کے باوجود مجھے وال سٹریٹ جنرل سمیت دیگر بہت سی جگہوں پر جو پڑھنے اور سننے کو مل رہا ہے اس سے لگتا ہے کہ انھیں صورتحال کا کوئی اندازہ نہیں ہے۔‘

امریکی صدر نے اپنے بیان میں روس اور یوکرین کے درمیان جاری تنازع پر بھی بات کی اور کہا کہ ’مجھے بتائیں کہ میں اس میں کیا برا کر رہا ہوں۔ یہ سابق صدر جو بائیڈن کی جنگ تھی، نہ کہ میری۔ میں تو اسے مزید بڑھانے کے بجائے ختم کرنے کی کوشش کر رہا ہوں۔‘

ٹرمپ نے دعویٰ کیا کہ اگر وہ صدر ہوتے تو یہ جنگ شروع ہی نہ ہوتی۔ انہوں نے یہ بھی کہا کہ ’مجھے ان لوگوں کے مشوروں کی ضرورت نہیں جو سالہا سال سے ان تنازعات میں شامل ہیں اور کبھی انہیں ختم کرنے کی کوشش نہیں کی۔ یہ بیوقوف لوگ ہیں جو موجودہ یوکرین اور روسی تنازع کو مزید پیچیدہ بنا رہے ہیں۔‘

انہوں نے عزم ظاہر کیا کہ ’تمام تر تنقید کے باوجود میں اس تنازع کا حل نکالوں گا اور میں نے ہمیشہ ایسا ہی کیا ہے۔‘

صدر نے کہا کہ ’کل وائٹ ہاؤس کے لیے ایک بڑا دن ہوگا۔ اتنی بڑی تعداد میں یورپی رہنما کبھی ادھر جمع نہیں ہوئے۔ ان کی میزبانی میرے لیے باعث فخر ہے۔‘

ٹرمپ نے ’فیک نیوز میڈیا‘ اور ڈیموکریٹ پارٹی پر بھی تنقید کرتے ہوئے کہا کہ وہ ہر صورت میں ان کی کامیابی کو کم تر دکھانے کی کوشش کریں گے۔

روس اور یوکرین کے درمیان جنگ کے خاتمے کے لیے یورپی رہنماؤں کی وائٹ ہاؤس آمد بھی شروع ہو گئی ہے۔ اس موقع پر برطانیہ کے وزیر اعظم سر کیئر سٹامر، جرمن چانسلر فریڈرک مرز، یورپین کمیشن کی صدر ارزولا فان ڈئر لاین، نیٹو سربراہ مارک روٹے اور اٹلی کی وزیر اعظم جورجیا ملونی سمیت دیگر رہنما موجود ہیں۔