ڈیرہ اسماعیل خان اور لکی مروت میں سکیورٹی فورسز کا آپریشن، ٹی ٹی پی کے 4 دہشت گرد ہلاک

ڈی آئی خان (بیورو رپورٹ) صوبہ خیبر پختونخوا کے لکی مروت کے سرحدی علاقے میں سکیورٹی فورسز اور پولیس کے مشترکہ آپریشن کے دوران 2 دہشتگرد ہلاک اور تین زخمی ہو گئے۔

ڈیرہ اسماعیل خان کے ساتھ منسلک وانڈہ ظریف والا پہاڑ اور شیخ بدین کے پہاڑی سلسلے میں دہشت گردوں کیخلاف کیا جانے والا آپریشن 36 گھنٹوں بعد مکمل ہو گیا۔

پولیس حکام کے مطابق آپرہشن کے دوران دہشتگردوں نے پولیس اور سکیورٹی فورسیز پر خودکار ہتھیاروں سے فائرنگ کی۔ جوابی کارروائی کے دوران 2 دہشت گرد ہلاک اور تین کے زخمی ہونے کی اطلاعات ہیں۔ ہلاک دہشتگرد ٹارگٹ کلنگ، بھتہ خوری، بم دھماکوں اور پولیس حملے میں بھی لکی مروت پولیس اور سی ٹی ڈی بنوں کو مطلوب تھے۔

دہشتگردوں سے بھاری مقدار میں اسلحہ، گولہ اور بارود بھی برآمد کر لیا گیا، دونوں دہشتگردوں کا تعلق کالعدم تنظیم ٹی ٹی پی سے ہے۔

اس موقع پر ڈی پی او لکی مروت نے کہا کہ شر پسندوں کے خلاف کارروائیاں جاری رہیں گی۔

ادھر ڈیرہ اسماعیل خان کی تحصیل کلاچی کے علاقے میں سیکورٹی فورسز کے آپریشن میں کالعدم تحریک طالبان پاکستان گنڈا پور گروپ کے دو دہشت گرد مارے گئے۔

حکام کا کہنا ہے کہ ہلاک دہشت گرد فورسز پر حملوں میں ملوث تھے۔