ڈیرہ اسماعیل خان میں عسکریت پسندوں کا حملہ، پولیس افسر سمیت 4 اہلکار ہلاک

ڈی آئی خان (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں شدت پسندوں کے حملے میں ایس ایچ او فہیم ممتاز سمیت چار پولیس اہلکار ہلاک جبکہ ڈی ایس پی پہاڑ پور سرکل عدنان سمیت دو اہلکار زخمی ہو گئے۔

ابتدائی اطلاعات کے مطابق واقعہ تھانہ پنیالہ کی حدود وانڈہ بڈھ میں پیش آیا جہاں شدت پسندوں کے ساتھ فائرنگ کے تبادلے میں اہلکار ہلاک ہوئے۔ زخمی ڈی ایس پی اور دیگر اہلکاروں کو ہسپتال منتقل کر دیا گیا ہے۔ 

بعض اطلاعات کے مطابق گل بہار چوک کے مقام پر تھانہ ہوید کی موبائل وین پر بھی فائرنگ کی گئی، تاہم دونوں واقعات کے باہمی تعلق سے متعلق سرکاری وضاحت سامنے نہیں آئی۔

وفاقی وزیر داخلہ محسن نقوی اور وزیر اعلیٰ خیبر پختونخوا سہیل آفریدی کے بعد صدرِ مملکت آصف علی زرداری نے بھی واقعے کی شدید مذمت کی ہے۔

ایوانِ صدر سے جاری بیان کے مطابق صدرِ مملکت نے حملے میں ہلاک ہونے والے ایس ایچ او فہیم ممتاز اور دیگر پولیس اہلکاروں کو خراجِ عقیدت پیش کیا اور ان کے درجات کی بلندی جبکہ اہلِ خانہ کے لیے صبرِ جمیل کی دعا کی۔ صدر نے زخمی افسران کی جلد صحتیابی کی بھی تمنا ظاہر کی۔

صدر آصف علی زرداری کا کہنا تھا کہ ملک سے بیرونی سرپرستی میں ہونے والی دہشت گردی کے ناسور کا جڑ سے خاتمہ اولین ترجیح ہے۔

وزیر داخلہ اور وزیر اعلیٰ خیبر پختونخوا نے بھی اہلکاروں کی ہلاکت کی مذمت کرتے ہوئے متاثرہ خاندانوں سے اظہارِ ہمدردی کیا ہے۔ تاحال کسی گروہ نے حملے کی ذمہ داری قبول نہیں کی۔