ڈیرہ اسماعیل خان میں فائرنگ سے پولیس اہلکار سمیت 2 افراد ہلاک، ایس ایچ او محفوظ رہے

ڈی آئی خان (نمائندہ ڈیلی اردو) خیبر پختونخوا کے ضلع ڈیرہ اسماعیل خان میں تھانہ چودہوان کے ایس ایچ او قاسم خان کی گاڑی پر فائرنگ کے نتیجے میں ایک پولیس اہلکار اور ایک راہگیر ہلاک ہو گئے، تاہم ایس ایچ او محفوظ رہے۔

پولیس کے مطابق یہ واقعہ موسیٰ زئی کے قریب پیش آیا، جہاں نامعلوم مسلح افراد نے فائرنگ کی۔ واقعے میں جاں بحق ہونے والے پولیس اہلکار کی شناخت ہیڈ کانسٹیبل جاوید عالم کے نام سے ہوئی ہے۔ فائرنگ کے دوران ایک راہ گیر بھی گولیوں کا نشانہ بن کر ہلاک ہو گیا۔

پولیس کا کہنا ہے کہ ایس ایچ او قاسم خان عدالت پیشی کے لیے اہلکاروں کے ہمراہ جارہے تھے کہ ان کی گاڑی کو نشانہ بنایا گیا۔ حملے میں ایس ایچ او محفوظ رہے۔

فائرنگ کے بعد ملزمان فرار ہو گئے، جن کی تلاش کے لیے علاقے میں سرچ آپریشن شروع کر دیا گیا ہے۔ لاشوں کو پوسٹ مارٹم کے لیے اسپتال منتقل کر دیا گیا ہے۔