ڈیرہ اسماعیل خان میں میزائل حملہ، پانچ بچے زخمی

ڈیرہ اسماعیل خان (ڈیلی اردو) ڈیرہ اسماعیل خان کی تحصیل درازندہ کے گاؤں شیخ میلہ میں ایک افسوسناک واقعہ پیش آیا، جہاں نامعلوم سمت سے داغے گئے میزائل نے علاقے میں خوف و ہراس پھیلا دیا۔ حملے کے نتیجے میں تین بچیوں سمیت پانچ بچے زخمی ہو گئے۔

واقعہ کی اطلاع ملتے ہی پولیس کی بھاری نفری جائے وقوعہ پر پہنچ گئی، جس نے علاقے کو گھیرے میں لے کر ابتدائی تفتیش شروع کر دی ہے۔ پولیس حکام کے مطابق، میزائل داغے جانے کی درست لوکیشن جاننے کے لیے مختلف زاویوں سے تحقیقات جاری ہیں، تاہم فوری طور پر یہ واضح نہیں ہو سکا کہ حملہ کس جانب سے کیا گیا۔

زخمی بچوں کو فوری طبی امداد کے لیے قریبی اسپتال منتقل کر دیا گیا ہے، جہاں ان کا علاج جاری ہے۔ واقعے نے علاقے میں شدید خوف کی فضا پیدا کر دی ہے جبکہ اہل علاقہ نے سیکیورٹی انتظامات مزید سخت کرنے کا مطالبہ کیا ہے۔