ڈیرہ اسماعیل خان میں پاکستانی طالبان کے حملے میں 5 ایف سی اہلکار ہلاک، 10 زخمی

واشنگٹن (ش ح ط) پاکستان کے شورش زدہ صوبے خیبرپختونخوا کے ضلع ڈیرہ اسماعیل خان کی تحصیل درابن کے علاقے کوٹ لالو میں کالعدم تحریک طالبان پاکستان (ٹی ٹی پی) کے دہشت گردوں کی فائرنگ کے نتیجے میں فرنٹیئر کانسٹیبلری (ایف سی) کے پانچ اہلکار ہلاک اور دس زخمی ہوگئے۔

ابتدائی اطلاعات کے مطابق ہلاک و زخمی ہونے والے اہلکار گیس کمپنی ایس این جی پی ایل کی سکیورٹی پر مامور تھے کہ اچانک دہشت گردوں نے گھات لگا کر فائرنگ شروع کردی۔ زخمی اہلکاروں کو فوری طور پر سی ایم ایچ ڈیرہ اسماعیل خان منتقل کیا گیا، جہاں بعض زخمیوں کی حالت تشویشناک بتائی جارہی ہے۔

ہلاک ہونے والے اہلکاروں میں نائب صوبیدار ارشد علی، عاشق اللہ، آصف نواز، کاشف خان، اور شاہد شامل ہیں۔ زخمی اہلکاروں میں حوالدار جمعہ خان، الیاس، انور زیب، جمشید، انتظار حسین، طارق، لال بہادر، عمران اور دیگر شامل ہیں۔

واقعے کے بعد سیکیورٹی فورسز نے علاقے کو گھیرے میں لے کر بڑے پیمانے پر سرچ آپریشن شروع کردیا گیا ہے۔

کالعدم تنظیم تحریک طالبان پاکستان نے حملے کی ذمہ داری قبول کرلی ہے۔