کراچی سے کالعدم ''زینبیون بریگیڈ'' کا انتہائی مطلوب ٹارگٹ کلر گرفتار

کراچی (نمائندہ ڈیلی اردو) پاکستان کے صوبہ سندھ کے صوبائی حکومت کراچی میں حساس اداروں نے ایک کارروائی کے دوران مبینہ طور پر ایرانی حمایت یافتہ کالعدم تنظیم “زینبیون بریگیڈ” سے تعلق رکھنے والے انتہائی مطلوب ٹارگٹ کلر کو گرفتار کر لیا ہے۔

تفصیلات کے مطابق کاؤنٹر ٹیررازم ڈیپارٹمنٹ (سی ٹی ڈی) اور ایک حساس ادارے نے یونیورسٹی روڈ پر مشترکہ انٹیلی جنس بیسڈ کارروائی کرتے ہوئے ملزم فرحان کو گرفتار کیا۔

سی ٹی ڈی حکام کا کہنا ہے کہ گرفتار ملزم شہر میں متعدد فرقہ وارانہ ٹارگٹ کلنگ کی وارداتوں میں ملوث رہا ہے۔

ابتدائی تفتیش کے مطابق ملزم نے مبینہ طور پر اعتراف کیا ہے کہ اس نے 2023 میں 12 ربیع الاول کے موقع پر فیڈرل بی ایریا بلاک 20 میں امام مسجد قیصر فاروق کو نشانہ بنایا تھا، جس کے دوران ایک بچہ عمر بھی زخمی ہوا۔

حکام کے مطابق ملزم نے یہ کارروائی اپنے ساتھی کے ہمراہ تنظیم کی ہدایت پر انجام دی تھی، جس کا مقصد شہر میں فرقہ وارانہ کشیدگی اور بدامنی پھیلانا تھا۔

سی ٹی ڈی کے مطابق ملزم کے قبضے سے مبینہ طور پر واردات میں استعمال ہونے والا 9 ایم ایم پستول بھی برآمد کیا گیا ہے۔

مزید بتایا گیا ہے کہ گرفتار ملزم کے دیگر ساتھیوں کی گرفتاری کے لیے چھاپے مارے جا رہے ہیں اور تفتیش جاری ہے۔۔