کراچی سے کالعدم ٹی ٹی پی کے 3 انتہائی مطلوب دہشت گرد گرفتار

کراچی (ڈیلی اردو) پاکستان کے صوبہ  سندھ کے دارالحکومت کراچی میں سندھ رینجرز نے کنواری کالونی، منگھوپیر روڈ پر کارروائی کرتے ہوئے کالعدم تحریک طالبان پاکستان (ٹی ٹی پی) کے انتہائی مطلوب تین دہشت گردوں کو گرفتار کرنے کا دعویٰ کیا ہے۔

رینجرز کے ترجمان کے مطابق گرفتار دہشت گردوں میں زید اللہ، نور زادہ اور عثمان شامل ہیں، جو خارجی امیر شمس القیوم عرف زاویل کے قریبی ساتھی ہیں۔

ترجمان نے بتایا کہ دوران تفتیش دہشت گردوں نے انکشاف کیا کہ وہ علاقے کے لوگوں کے نمبر شمس القیوم عرف زاویل کو فراہم کرتے تھے، جس کے بعد زاویل بھتہ وصولی کے لیے ان نمبرز پر رابطہ کرتا تھا۔

بیان میں مزید کہا گیا کہ دہشت گردوں نے منشیات فروشوں سے بھتہ وصولی اور لینڈ گریبنگ میں ملوث ہونے کا بھی اعتراف کیا ہے۔

رینجرز کے مطابق گرفتار دہشت گرد نور زادہ کا بھائی خان زادہ عرف حنظلہ اور دہشت گرد عثمان کا بھائی عمر خطاب بھی کالعدم ٹی ٹی پی کے انتہائی مطلوب کارندے تھے، جو پہلے مارے جا چکے ہیں۔

مزید برآں، دہشت گرد زید اللہ عرف زیدو تھانہ ایکسائز کورنگی اور اینٹی نارکوٹکس فورس (اے این ایف) کو بھی مطلوب تھا۔

گرفتار ملزمان کو مزید قانونی کارروائی کے لیے پولیس کے حوالے کر دیا گیا ہے۔