کراچی میں انتہا پسندوں کا حملہ، احمدی شہری لئیق احمد چیمہ تشدد سے ہلاک

کراچی (نمائندہ ڈیلی اردو) صوبہ سندھ کے صوبائی حکومت کراچی کے علاقے صدر کی پریڈی سٹریٹ پر احمدیوں کی ایک عبادت گاہ کے باہر تحریک لبیک پاکستان (ٹی ایل پی) کے کارکنان کے احتجاج کے دوران مبینہ طور پر تشدد سے ایک احمدی شہری ہلاک ہو گیا ہے۔

پریڈی تھانے کے ایس ڈی پی او محمد صفدر کے مطابق ہلاک ہونے والا شخص مظاہرین کے تشدد کا نشانہ بنا۔ ان کا کہنا تھا کہ واقعے کی ایف آئی آر درج کی جا رہی ہے اور تفتیش کے بعد پتہ چلے گا کہ تشدد میں کون ملوث تھا۔

ایک پولیس اہلکار نے بتایا کہ ہلاک ہونے والا احمدی شہری مظاہرے کی ویڈیو بنا رہا تھا، جب اس پر حملہ کیا گیا۔ اہلکار کے مطابق اس وقت عبادت گاہ کے باہر تقریباً 200 مظاہرین موجود تھے جو شدید نعرے بازی کر رہے تھے۔

جمعے کی دوپہر احمدیہ کمیونٹی کی جانب سے جاری بیان میں کہا گیا کہ موبائل مارکیٹ صدر میں واقع احمدیہ ہال کے باہر ایک ہجوم جمع ہے، جس نے عبادت گاہ کا محاصرہ کیا ہوا ہے۔ بیان کے مطابق اندر تقریباً 40 احمدی عبادت کے لیے موجود تھے۔

بیان میں بتایا گیا کہ احمدی شہری لئیق احمد چیمہ کو مظاہرین نے اینٹوں اور ڈنڈوں سے مارا، جس کے نتیجے میں ان کی موت واقع ہوئی۔

پولیس کے مطابق واقعے کی تحقیقات جاری ہیں۔