کراچی میں رینجرز اور پولیس کی کارروائی، آئی ایس آئی کا جعلی کرنل گرفتار

کراچی (ڈیلی اردو) پاکستان رینجرز، سندھ نے دعویٰ کیا ہے کہ انہوں نے کراچی سے آئی ایس آئی کا ایک جعلی فوجی افسر کو گرفتار کر لیا جو شہر میں متعدد جرائم میں ملوث تھا۔

رینجرز کے ترجمان کی جانب سے ملزم کی شناخت عرفان احمد کے نام سے کی گئی ہے، جسے خفیہ آپریشن کے دوران گرفتار کیا گیا، یہ آپریشن بوٹ بیسن کے علاقے میں پیرا ملٹری فورسز اور پولیس کی ٹیموں نے مشترکہ طور پر کیا۔

ترجمان رینجرز کے مطابق گرفتار شخص لیاری کے علاقے موسیٰ لین کا رہائشی ہے اور خود کو خفیہ ایجنسی کا کرنل ظاہر کرتا تھا۔

انہوں نے بتایا کہ ملزم نے میڈیکل کالجز، تعلیمی اداروں کی ڈگریوں اور نوکریوں کا جھانسہ دے کر شہریوں سے بڑے پیمانے پر رقم حاصل کی۔

رینجرز ترجمان کا کہنا تھا کہ ملزم کے قبضے سے خفیہ ایجنسی آئی ایس آئی کا جعلی کارڈ، وردی اور متعدد جعلی دستاویزات بھی حاصل کی گئی ہیں۔

علاوہ ازیں ملزم کو مزید قانونی کارروائی کے لیے پولیس کے حوالے کردیا گیا۔