کراچی میں سی ٹی ڈی اور رینجرز کی کارروائی، سندھ ریولیوشن آرمی کے 4 دہشت گرد گرفتار

کراچی (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) اور رینجرز نے کراچی کے علاقے گلستان جوہر میں کارروائی کرتے ہوئے دہشت گرد تنظیم کے 4 کارندے گرفتار کرلیے۔

ترجمان سی ٹی ڈی کے مطابق رات گئے گلستان جوہر پہلوان گوٹھ میں سی ٹی ڈی اور رینجرز نے مشترکہ کارروائی کی، کارروائی میں کالعدم تنظیم کے 4 کارندوں سجاد علی چنا، محسن رضا چنا، نوشاد علی عرف صدام اور اسلم بیگ کو گرفتار کرلیا گیا۔

ترجمان کے مطابق ملزمان سے اسلحہ اور دستی بم برآمد کیے گئے ہیں، ملزمان کا تعلق سندھ ریولیوشن آرمی اصغر شاہ عرف سجاد شاہ گروپ سے ہے۔

ملزمان کا گروہ قانون نافذ کرنے والے اداروں پر حملے اور ٹارگٹ کلنگ میں ملوث ہے، ملزمان کے خلاف مقدمات درج کر کے مزید تفتیش شروع کر دی گئی ہے۔