کراچی میں سی ٹی ڈی کی کارروائی، لشکر جھنگوی کے ٹارگٹ کلر سمیت 4 شدت پسند گرفتار

کراچی (نمائندہ ڈیلی اردو) کالعدم تنظیم لشکر جھنگوی سے تعلق رکھنے والے ٹارگٹ کلر سمیت چار ملزمان کو سی ٹی ڈی نے خفیہ اطلاع پر کارروائی کرتے ہوئے گرفتار کر لیا ہے۔ یہ کارروائی پولیس مخبروں اور فرقہ وارانہ بنیادوں پر حالیہ ٹارگٹ کلنگز کے سلسلے میں کی گئی۔

ترجمان کے مطابق گرفتار ہٹ مین امین عرف منا قاسم رشید گروپ کا کارندہ ہے اور اس سے قبل بھی دہشت گردی کے مقدمات میں جیل جا چکا ہے۔ ابتدائی تفتیش میں اس نے اعتراف کیا کہ اس نے ساتھیوں کے ساتھ مل کر پولیس مخبروں اور شیعہ نوجوان عادل حسین کو فرقہ وارانہ بنیادوں پر ہلاک کیا، جبکہ وہ ’سپاری‘ لے کر بھی ہلاکت کرتا تھا۔

دیگر گرفتار شدت پسندوں کی شناخت عاصم احمد، زین العابدین اور محمد افروز کے ناموں سے ہوئی۔ ملزمان سے چار پستول اور گولیاں بھی برآمد ہوئی ہیں۔

سی ٹی ڈی کے مطابق ملزمان کے خلاف شہر کے مختلف تھانوں میں دہشت گردی اور سنگین جرائم کے متعدد مقدمات درج ہیں۔ ابتدائی تفتیش میں یہ بھی سامنے آیا کہ ملزمان نے حال ہی میں اورنگی ٹاؤن میں پولیس مخبر سمجھے جانے والے شہباز خان اور اقبال مارکیٹ میں مخالف فرقے کے عادل حسین کو ہلاک کرنے کا اعتراف کیا۔