کراچی: وفاقی حساس ادارے اور سی ٹی ڈی کی مشترکہ کارروائی، ‘را’ سے تربیت یافتہ 3 دہشت گرد گرفتار

کراچی (ڈیلی اردو) کراچی میں وفاقی حساس ادارے اور سی ٹی ڈی نے مشترکہ کارروائی کرتے ہوئے را سے مبینہ طور پر تربیت یافتہ متحدہ قومی موومنٹ (ایم کیو ایم لندن) کے 3 دہشتگرد گرد گرفتار کر لیے گئے۔

سی ٹی ڈی کے مطابق حیدرآباد اور کراچی سے تعلق رکھنے والے 3 دہشت گردوں کو گرفتار کیا گیا ہے۔ ملزمان سے ایک کلاشنکوف، نائن ایم ایم پستول، 30 بور پستول، دستی بم اور راونڈز برآمد ہوئے۔

سی ٹی ڈی کے مطابق گرفتار ملزم نعیم احمد ایم کیو ایم لندن حیدر آباد کا سینیئر کارکن اور سندھ آرگنائزنگ کمیٹی کا جوائنٹ انچارج ہے۔ ملزم نے قیادت کے حکم پر مخالفین کے قتل اور دہشتگردی کیلئے 6 رکنی گروہ بنایا جس میں خفیہ ایجنسی را سے عسکری تربیت یافتہ کارکنان دہشتگرد شامل ہیں۔

ملزم نعیم دہشت گردی، ڈکیتی، جلاؤ گھیراؤ، پولیس قتل، بم دھماکوں میں گرفتار ہوچکا ہے۔ گرفتار ملزم عمران ایم کیو ایم لندن حیدر آباد کا سابقہ سیکٹر انچارج اور یو سی چیئرمین رہ چکا ہے جبکہ گرفتار ملزم علیم الدین اے پی ایم ایس او کراچی کا کارکن اور را سے تربیت یافتہ ہے۔

ملزم پولیس اہلکاروں کو ہلاک کرنے اور دیگر مقدمات میں جیل جا چکا ہے، حیدرآباد کے دہشتگردوں نے ساوتھ افریقا سے ہدایات ملنے پر گروپ بنانے اور اسلحہ، ایمونیشن، ہینڈ گرینیڈ کراچی لانے کا اعتراف کیا ہے۔ ایم کیو ایم لندن کے بعض رہنماوں سے تفتیش کئے جانے کا امکان ہے۔