کرم حملوں میں ملوث 14 دہشت گردوں کے سروں کی قیمت مقرر، تصاویر جاری

پشاور (نمائندہ ڈیلی اردو) ‏کاؤنٹر ٹیررازم ڈیپارٹمنٹ (سی ٹی ڈی) خیبر پختونخوا نے قبائلی ضلع کرم میں شیعہ مسافر گاڑیوں اور قافلوں پر حملوں میں ملوث 14 دہشت گردوں کے نام اور تصاویر جاری کردیں۔

سی ٹی ڈی کے مطابق دہشت گرد کرم میں 200 سے زیادہ افراد کے ہلاکت میں ملوث ہیں، دہشت گردوں کے سروں کی قیمتیں 30 لاکھ سے 3 کروڑ روپے تک مقرر کردیں۔

سی ٹی ڈی کے مطابق انتہائی مطلوب افراد میں کاظم عرف احمد کے سرکی قمیت 3 کروڑ مقرر کی گئی۔

دیگر مطلوب دہشت گردوں میں احمد اللہ 2 کروڑ، مکرم خان ڈیڑھ کروڑ، درویش وزیر ایک کروڑ، سیف اللہ، عثمان اور نور اللّٰہ کے سر کی قیمت ایک ایک کروڑ روپے مقرر کی گئی۔

محکمہ انسداد دہشتگردی کا کہنا ہے کہ دہشت گردوں کا تعلق کالعدم تحریک طالبان پاکستان (ٹی ٹی پی) سے ہے، دہشت گرد غیرملکی آقاؤں کی ایماء پر کرم میں فرقہ وارانہ فسادات میں ملوث ہیں۔

سی ٹی ڈی کا کہنا ہے کہ دہشت گرد لوٹ مار، جلاؤ گھیراؤ جبکہ بچوں اور خواتین کے ہلاکت میں بھی ملوث ہیں، دہشت گردوں کے بارے میں اطلاع دینے والوں کو انعام دیا جائے گا۔

واضح رہے شورش زدہ ضلع کرم میں چند ماہ قبل بھی شیعہ سنی قبائل کے درمیان مسلح تصادم ہوا تھا جس کے نتیجے میں 200 سے زائد افراد کی ہلاکت ہوئی تھی جبکہ بعد ازاں امن معاہدے کے بعد بھی دہشت گردوں نے کرم جانے والے امدادی قافلوں پر حملے کیے تھے۔