کرم میں سیکورٹی فورسز کے چیک پوسٹ پر دہشت گردوں کا حملہ، ایک اہلکار ہلاک، 11 زخمی

صدہ + راولپنڈی (نمائندگان ڈیلی اردو) صوبہ خیبر پختونخوا کے قبائلی ضلع کرم کے علاقے شکر تنگی میں فرنٹیئر کور (ایف سی) کے چیک پوسٹ پر دہشت گردوں کے حملے میں ایک اہلکار ہلاک اور 11 اہلکار زخمی ہوگئے۔

قبائلی ضلع کرم میں سینٹرل کرم کے علاقے شکر تنگی میں فرنٹیئر کور (ایف سی) کے 111 ونگ کرم ملیشا کے چیک پوسٹ پر دہشت گردوں کے حملے میں ایک اہلکار ہلاک اور 11 زخمی ہوگئے۔ #Kurram #CentralKurram #Pakistan

— Shabbir Hussain Turi (@ShabbirTuri) September 29, 2023

سرکاری ذرائع کے مطابق زخمیوں میں حوالدار محمد رحمان، نائیک سید محمد، نائیک نبی الله، لانس نائیک مشتاق احمد، سپاہی اول میر، لانس نائیک سلیم خان، لانس نائیک محمد الله، سپاہی ناصر خان، سپاہی کاشف اور دیگر اہلکار شامل ہے۔

پاکستانی فوج کے شعبہ تعلقات عامہ (آئی ایس پی آر) کے مطابق ضلع کرم کے علاقے پاراچنار میں سیکیورٹی فورسز اور دہشت گردوں کے درمیان جھڑپ ہوئی، جہاں فائرنگ کے تبادلے میں لانس نائیک غیرت خان ہلاک ہوگیا، 33 سالہ غیرت خان کا تعلق کرم سے تھا۔

ترجمان پاکستانی فوج کا کہنا ہے کہ پاکستان کی سیکیورٹی فورسز ملک سے دہشت گردی کی لعنت کے خاتمے کے لیے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔

آئی ایس پی آر کے مطابق دہشت گردوں اور سکیورٹی فورسز کے درمیان جھڑپ 28 اور 29 ستمبر کی رات ہوئی۔