کرک : پولیس موبائل وین پر آئی ای ڈی حملہ، ڈرائیور ہلاک، 6 اہلکار زخمی

کرک(ڈیلی  اردو) خیبرپختونخواہ کے شورش زدہ ضلع کرک کی تحصیل بانڈہ داؤد شاہ میں بہادر خیل کے قریب گھول بانڈہ کے پہاڑی علاقے میں پولیس موبائل وین کو سڑک کنارے نصب دیسی ساختہ بم (آئی ای ڈی) سے نشانہ بنایا گیا، جس کے نتیجے میں پولیس ڈرائیور واجد ہلاک جبکہ 6 اہلکار زخمی ہوگئے۔

مقامی ذرائع کے مطابق پولیس موبائل وین سردار گاہ کی جانب جارہی تھی کہ راستے میں نصب آئی ای ڈی پھٹ گیا۔ دھماکے میں سید شاہ، نورشالی، عمران، شمیم، گوہر، یاسین اور ڈرائیور واجد زخمی ہوئے، جنہیں فوری طور پر طبی امداد کے لیے ہسپتال منتقل کیا گیا، تاہم واجد زخموں کی تاب نہ لاتے ہوئے ہلاک ہوگیا۔

حملے کے بعد پولیس اور سکیورٹی اہلکاروں نے علاقے کو گھیرے میں لے کر شواہد اکٹھے کرنا شروع کردیئے، جبکہ حملے میں ملوث افراد کی تلاش کے لیے قریبی پہاڑی علاقوں میں سرچ آپریشن جاری ہے۔